VOV4.Êđê- Aguah hruê 21/4 mbruê, jing hruê 10/3 hluê hruê mlan ƀlĕ, ti Wăl knhuah gru hƀuê ênuk Sang yang Hùng, ƀuôn prŏng Việt Trì, čar Phú Thọ, mkŏ mjing leh Knăm čuh brui mngưi bi hdơr, lač jăk kơ Mtao Hùng. Khua lăn čar Nguyễn Xuân Phúc nao lehanăn čuh leh brui mngưi. Nao ti knăm anei, mâo Khua hlăm Phŭn bruă kđi čar, Khua hlăm Anôk kiă kriê bruă Đảng gưl dlông Võ Văn Thưởng; Khua hlăm Phŭn bruă kđi čar, Khua anôk bruă mkŏ mjing gưl dlông Trương Thị Mai; mbĭt hŏng phung khua kiă kriê hđăp mơ̆ng Đảng, knŭk kna, phung khua kiă kriê dŭm Phŭn, dhar bruă, alŭ wăl. Knăm bi hdơr Hruê djiê Mtao Hùng Vương jing Knăm bi hdơr ala čar, jing hruê kluôm ala čar hdơr kơ klei đru mguôp prŏng prĭn mơ̆ng phung Mtao Hùng hlăm hdră mkŏ mkra lăn čar.

Leh hluê ngă knăm ngă yang bi Sang Yang, Khua lăn čar Nguyễn Xuân Phúc lehanăn êpul ngă bruă nao dưm leh kwang mnga ti Msat Mtao Hùng. Ti kwang mnga anei mâo boh hră čih: Hdơr nanao kơ Mtao Hùng mâo leh klei đru mguôp prŏng hlăm hdră mkŏ mjing lăn čar. Leh knăm anei, Khua lăn čar lehanăn Êpul nao dưm leh kwang mnga ti Rup krah Awa Hô dôk blŭ hrăm hŏng phung lĭng kahan Đại đoàn quân Tiên Phong.

                                                    Pô mblang: H’Nêč Êñuôl