VOV4.Êđê - Aguah mbruê (13/5), ti Dinh Độc Lập, ƀuôn prŏng Hồ Chí Minh, Khua lăn čar Nguyễn Xuân Phúc drông leh êpul bi ala Phung khua kiă kriê gưl dlông klei đăo Yơng Việt Nam ƀri knăm Phật Đản 2021 – Phật lịch 2565 mâo Hoà Thượng Thích Thiện Nhơn, Khua Êpul hgŭm kiă kriê klei đăo Yơng djă akŏ, lehanăn phung khua kiă kriê hlăm êpul klei đăo Yơng Việt Nam.

Thŭn anei phung khua kiă kriê klei đăo lehanăn phung yơng Việt Nam mkŏ mjing knăm Phật Đản 2021 hlăm klei răng, gang mkhư̆ klei ruă tưp, lehanăn mâo ai tiê mđĭ ai jih jang phung đăo yơng mơh, kñăm mjing ai tiê êđăp ênang, ktưn hlăm klei hdĭp dưi găn klei dleh dlan, lehanăn hrăm mbĭt mđĭ kyar lăn čar. Khua lăn čar đăo knang lehanăn hmăng hmưi kơ klei đăo Yơng Việt Nam lŏ dơ̆ng bi êdah bruă klam pô hlăm bruă mkŏ mjing klei bi mguôp jih jang djuê ana, bi mguôp klei đăo, dưn yua ai ktang mơ̆ng klei đăo, mơ̆ng dhar kreh pioh mđĭ kyar lăn čar./.

Y Khem pô mblang