VOV4.Êđê- Hruê 16-4, ti Anôk bruă Khua lăn čar, Khua lăn čar Nguyễn Xuân Phúc drông Khua bi ala Mi Daniel Kritenbrink nao ba hră hơêč hmưi mơ̆ng Khua mil čhil Mi Joe Biden kơ Khua lăn čar Nguyễn Xuân Phúc ƀri gưl Khua lăn čar dưi mâo Quốc hội đaŏ knang ruah ngă Khua lăn čar Việt Nam leh anăn kkuh mjưh ruê wưng păn bruă.

Hlăm mmông bi tuôm, Khua lăn čar Nguyễn Xuân Phúc bi mni kơ dŭm klei đru mguôp jăk mơ̆ng Khua bi ala ba klei bi hgŭm dua ala čar lŏ dơ̆ng mđĭ kyar  tŭ dưn, hơĭt kjăp, êlam hĭn leh anăn hdơ̆ng mâo klei tŭ dưn. Khua lăn čar hơêč hmưi kơ Khua bi ala Daniel Kritenbrink mâo khua mil čhil Joe Biden đaŏ knang, mgơ̆ng ngă K’iăng khua hŏng tač êngao klam bruă krĭng răn Ngŏ Châu Á-Thái Bình Dương, mbĭt anăn đaŏ knang hlăm bruă klam mrâo, Khua bi ala srăng lŏ dơ̆ng đru kơ klei bi hgŭm Việt Nam - Mi.

Pô mblang: H’Zawut Ƀuôn Yă