VOV4.Êđê -  Mmăt hruê 19/4 mbruê, Khua lăn čar Nguyễn Xuân Phúc gĭt gai leh Klei bi kƀĭn trông pŏk mlar gưl dlông mơ̆ng Êpul hgŭm răng mgang klei êđăp ênang Liên Hợp Quốc hluê hdră trực tuyến. Leh Khua lăn čar Nguyễn Xuân Phúc hưn mthâo knăm mphŭn pŏk hdră bi trông, mâo leh 7 čô mă bruă hlak mblang mâo klei blŭ hrăm.

Anăn jing Khua gĭt gai Liên hợp quốc Antonio Guterres, Khua phŭn bruă hŏng tač êngao Brunei Darussalam Dato Erywan Pehin Yusof, Khua mil čhil Estonia Kersti Kaljulaid, Khua mil čhil Kenya Uhuru Kenyatta, Khua phŭn bruă hŏng tač êngao Trung Quốc Vương Nghị, Khua gĭt gai Êpul hgŭm Arab Ahmed Aboul Gheith... Mbĭt hŏng anăn jing 15 klei bi blŭ hrăm yuôm bhăn mkăn mơ̆ng pô bi ala dŭm ala čar. Blŭ hrăm ti knăm anei, Khua gĭt gai Liên hợp quốc lehanăn phung khua dŭm ala čar hgŭm hlăm Êpul hgŭm răng mgang klei êđăp ênang bi mni klei mĭn mrâo mơ̆ng Việt Nam hlăm hdră mkŏ mjing bruă yuôm bhăn anei./.

H Nêč pô mblang