VOV4.Êđê - Tui hluê klei hưn mdah mơ̆ng phŭn bruă hŏng tač êngao, hruê 19/4 ti Hà Nội, hŏng bruă ngă jing khua gĭt gai Êpul răng mgang klei êđăp ênang Liên Hợp Quốc mlan 4/2021, khua lăn čar Nguyễn Xuân Phúc gĭt gai klei bi trông gưl dlông hŏng kŏ “mđĭ klei bi mguôp mơ̆ng Liên Hợp Quốc hŏng dŭm êpul êya hlăm alŭ wăl čiăng mtrŭt mjhar klei đăo knang leh anăn blŭ hrăm hlăm bruă gang mkhư̆, mgaih msir klei mjhik mtul” tui hluê êlan trực tuyến leh anăn mtuôm ƀô̆ mta.

Anei jing klei kñăm yuôm bhăn ala čar Việt Nam gĭt gai mkŏ mjing hlăm bruă ngă jing khua gĭt gai Êpul răng mgang klei êđăp ênang Liên Hợp Quốc, anôk bruă mâo bruă klam tal êlâo hĭn hlăm bruă gang mkhư̆ klei bi blah, mjhĭk mtul, rơ̆ng klei êđăp ênang tar rŏng lăn. K’iăng khua phŭn bruă hŏng tač êngao brei thâo, Việt Nam gĭt gai, mkŏ mjing leh anăn hur har hlăm dŭm bruă tui hlue klei bi mklă mơ̆ng khua kiă kriê Êpul răng mgang klei êđăp ênang Liên Hợp Quốc. Klei bi mklă mâo boh phŭn yuôm bhăn, bi klă klei yuôm bhăn bruă bi mguôp mơ̆ng Liên Hợp Quốc hŏng dŭm êpul êya hlăm alŭ wăl čiăng gang mkhư̆, mgaih msir klei mjhĭk mtul hŏng dŭm hdră êlan êđăp ênang, mpŭ kơ dŭm klei bhiăn mâo leh mơ̆ng klei bhiăn tar rŏng lăn leh anăn hdră bhiăn mơ̆ng Liên Hợp Quốc.

Y Khem Niê pô mblang