VOV4.Êđê- Khua lăn čar Nguyễn Xuân Phúc mrâo nao čhưn ti să krĭng ƀuôn sang mrâo Tứ Xã, kdriêk Lâm Thao, čar Phú Thọ. Bi mni hlăm wưng êgao, bruă Đảng, bruă sang čư̆ êa leh anăn mnuih ƀuôn sang să bi hgŭm, mbruă, ieu mkrum djăp klei găl mkŏ mkra krĭng ƀuôn sang mrâo leh anăn bi leh knŏng hlăm 4 thŭn, Khua gĭt gai ala čar mtă kơ să Tứ Xã, kdriêk Lâm Thao leh anăn čar Phú Thọ ksiêm hriăm kơ bruă mđĭ kyar să krĭng ƀuôn sang mrâo bi hmô jing ƀuôn prŏng mơ̆ng tur knơ̆ng kreh knhâo leh anăn djŏ guôp hŏng hdră čăl mkă mđĭ kyar bruă duh mkra ala ƀuôn.

Êlâo kơ bi tuôm hŏng mnuih ƀuôn sang ti să Tứ Xã ti alŭ mnuih ƀuôn sang dôk mrô 7, Khua lăn čar Nguyễn Xuân Phúc nap čuăn dŭm hdră bruă nah gŭ msĕ si sang mnia, tač mjuăt asei mlei, hdră bruă êlan klông nah gŭ mơ̆ng să. Bi ala kơ Đảng, Knŭk kna, Khua lăn čar Nguyễn Xuân Phúc hơêč hmưi kơ bruă Đảng, knŭk kna leh anăn mnuih ƀuôn sang să Tứ Xã, kdriêk Lâm Thao kơ dŭm klei tŭ dưi mâo hlăm bruă mkŏ mkra krĭng ƀuôn sang mrâo hlăm wưng êgao. Khua lăn čar ăt bi mni kơ čar Phú Thọ hlăm bruă mđĭ kyar kluôm ênŭm bruă duh mkra ala ƀuôn, mđing mkŏ mkra krĭng ƀuôn sang mrâo.

Pô mblang: H’Zawut Ƀuôn Yă