VOV4.Êđê -  Dŭm êpul êya lĭng kahan brei ba anăp, hluê ngă hdră ba ana kyâo đĭ jing jăk, nao hgŭm ksiêm dlăng bruă pla ana kyâo prŏng čiăng răng mgang wăl hdĭp mda sui thŭn. Lŏ dơ̆ng mđĭ lar bruă klam mơ̆ng dŭm êpul bruă duh mkra, lĭng kahan lehanăn dŭm êpul êya bruă mâo klei găl kơ lăn ala, yan adiê čiăng ba pla, mđĭ kyar dliê. Anei jing klei mâo Khua lăn čar Nguyễn Xuân Phúc hưn mdah hŏng dŭm êpul êya bruă lĭng kahan ti knăm mtrŭt mjhar bruă pla ana kyâo hdơr nanao kơ Awa Hô mâo Phŭn bruă lĭng kahan mkŏ mjing aguah hruê 13/4 ti Wăl knhuah gru hƀuê ênuk K9 - Đá chông, Ba Vì, Hà Nội. Hluê si klei hưn mơ̆ng Phŭn bruă lĭng kahan, hlăm wưng thŭn 2015 – 2020, kluôm êpul kahan pla leh giăm 11 êklăk ana kyâo mtah djăp mta. Mơ̆ng akŏ thŭn truh kơ ară anei, dŭm êpul êya lĭng kahan mâo pla leh 1,5 êklăk phŭn ana kyâo mtah, 737 ha dliê, đĭ 2,7 bliư̆ mkă hŏng wưng anei thŭn êlâo. Kluôm anôk bruă kahan srăng bi leh hdră kčah pla 3,3 êklăk phŭn ana kyâo lehanăn 1.785 ha dliê hlăm thŭn anei. Khua lăn čar mtă kơ Phŭn bruă lĭng kahan brei mđĭ hdră mtô mblang hlăm mnuih ƀuôn sang, hlăm phung knuă druh, lĭng kahan kơ bruă klam, klei tŭ yuôm mơ̆ng bruă pla ana kyâo, pla dliê, mbĭt anăn pŏk ngă tŭ dưn hdră bruă 1 êklai ana kyâo mtah – kyua sa Việt Nam Mtah hŏng dŭm hdră ngă bruă klă sĭt hĭn./.

H Nêč pô mblang