VOV4.Êđê - Aguah mbrue (5/4), Khua lăn čar Nguyễn Xuân Phúc ngă klei bhiăn ƀuăn rơ̆ng đĭ păn bruă ti gŭ hla čhiăm gru lăn čar, ti anăp Quốc hội lehanăn phung ƀuôn sang kluôm ala. Bi klă klei ruah Nguyễn Xuân Phúc păn ngă khua lăn čar yang ƀuôn ngă phŭn Việt Nam, mâo leh phung bi ala Quốc hội mplĕ hră hŏng 468/468 pô bi ala mplĕ hră tŭ ư.

Blŭ hrăm ti anôk đĭ păn bruă, Khua lăn čar Nguyễn Xuân Phúc ƀuăn srăng gĭr jih ai tiê pô, ktưn ngă bi leh bruă jao, bruă čuăn mơ̆ng hdră bhiăn phŭn, hdră bhiăn knŭk kna čoh čuăn leh, lehanăn bi leh jăk bruă mơ̆ng Đảng, lăn čar, lehanăn phung ƀuôn sang jao. Mñă klă, mă klei hriăm hŏng bruă ngă leh lehanăn dŭm boh tŭ dưn jăk siam mơ̆ng phung khua kiă kriê êlâo, anăn yơh jing ngăn dưn yuôm bhăn kơ pô hlăm anôk pô ngă jing khua lăn čar./.

Y Khem pô mblang