VOV4.Êđê -  Hlăm hruê ruah khua 23/5, khua lăn čar Nguyễn Xuân Phúc srăng mplĕ hră ruah khua ti kdriêk Củ Chi, ƀuôn prŏng Hồ Chí Minh. Anei jing klei mrâo mơ̆ng pô bi ala dhar bruă ruah khua kdriêk Củ Chi ba mdah hlăm klei bi kƀĭn tal 13 mơ̆ng dhar bruă ruah khua ƀuôn prŏng Hồ Chí Minh ti tlam hruê 18/5. Tui hluê dhar bruă ruah khua kdriêk Củ Chi, ti hruê 23/5, anôk khua lăn čar srăng nao mplĕ hră jing anôk ƀuôn prŏng 7 hlăm wăl krah Củ Chi, kdriêk Củ Chi. Dŭm êpul êya kahan ksiêm, lĭng kahan dưi mba anôk mă bruă hlăm anôk khua lăn čar srăng nao mplĕ hră. Bi kơ bruă ruah khua ti sang êa drao jing êjai Củ Chi, kdriêk srăng ba huôm mplĕ hră truh ti anăn, lŏ mbŏ hlăm sa êpul mplĕ hră 2 čô nai mdrao, aê mdrao dôk hlăm lam čiăng ksiêm dlăng hră mplĕ. Phung mplĕ hră srăng dưi mba giê čih, giê treh yua sa blư̆. Ti ƀuôn prŏng Hồ Chí Minh, khua lăn čar Nguyễn Xuân Phúc jing pô mgơ̆ng asei ngă pô bi ala Quốc Hội gưl 15 ti alŭ wăl mrô 10 (kdriêk Củ Chi lehanăn kdiêk Hóc Môn).