VOV4.Êđê - Tlam hruê 19/5/2021, Khua phŭn bruă hŏng tač êngao Bùi Thanh Sơn bi trông leh hluê êlan đĭng blŭ hŏng K’iăng khua knŭk kna, Khua phŭn bruă hŏng tač êngao Thái Lan Don Pramudwinai. Dua khua phŭn bruă tŭ ư bi hgŭm kjăp, mtrŭt mđĭ hdră mkŏ mjing knăm bi hdơr 45 thŭn hruê mkŏ mjing Klei bi mjĕ Việt Nam - Thái Lan, lŏ dơ̆ng mtrŭt mđĭ hdră ngă bruă hluê êpul gưl dlông lehanăn dŭm gưl hlăm mmông djŏ guôp, pŏk ngă tŭ dưn dŭm klei bhiăn hgŭm bruă dua nah, hlăm anăn mâo Klei bi kƀĭn knŭk kna kluôm tal 4 mâo Khua knŭk kna dua ala čar hrăm mbĭt gĭt gai, Dhar bruă bi hgŭm bruă dua nah tal 4 g ưl Khua phŭn bruă hŏng tač êngao, Ksiêm dlăng kơ bruă kdid čar tal 8 gưl K’iăng khua phŭn bruă hŏng tač êngao. Dua khua phŭn bruă tŭ ư srăng hnưm siñê bi mklă Hdră bruă pŏk ngă Klei bi mjĕ ƀĭng hgŭm phŭn kluôm dhuôm wưng thŭn 2021-2025; pŏk ngă dŭm hdră msir mtrŭt mđĭ bruă mnia mblei, đru krŭ wĭt bruă duh mkra leh wưng bluh mâo klei ruă, gĭr bi mâo ênoh prăk mnia mblei duah nah truh 25 êklai đôlar, bi hgŭm mdrơ̆ng hŏng klei ruă lehanăn dưi dưn yua vaccine hŏng klei êđăp ênang, tŭ dưn./.

H Nêč pô mblang