VOV4.Êđê- Tlam hruê 14/4, Khua phŭn bruă hŏng tač êngao Bùi Thanh Sơn mâo leh klei bi trông trực tuyến hŏng Khua phŭn bruă hŏng tač êngao Australia Marise Payne, Khua phŭn bruă hŏng tač êngao Malaysia Hishammuddin Hussein, Khua phŭn bruă hŏng tač êngao Philippines Teodoro Locsin. Hlăm dŭm klei bi trông, phung Khua phŭn bruă bi tŭ ư hlăm wưng kơ anăp srăng bi hgŭm tliêr kjăp mđĭ kyar klei bi hgŭm hŏng Việt Nam hlăm djăp mta bruă lŏ dơ̆ng ngă êlam hĭn, tŭ dưn, hlăm anăn kƀĭn hlăm dŭm mta phŭn: mđĭ bi trông leh mâo klei găl, mđĭ ktang klei bi tuôm gưl dlông leh anăn dŭm gưl hŏng hdră djŏ guôp, pŏk ngă tŭ dưn dŭm klei bhiăn bi hgŭm leh anăn bi kuôl kă dua nah, mđĭ ktang leh anăn bi êlam hĭn klei bi hgŭm klei êđăp ênang -lĭng lahan, lŏ dơ̆ng bi đru kơ bruă lŏ hma - kan hdang ba čhĭ kơ ala tač êngao, mnia blei- duh bi liê leh anăn bi hgŭm ODA. Phung khua phŭn bruă bi tŭ ư srăng lŏ dơ̆ng bi hgŭm tliêr kjăp hlăm dŭm klei bi kƀĭn lu tĭng, ăt msĕ mơh dŭm bruă krĭng wăl leh anăn tar rŏng lăn mđing.

                        Pô mblang: H’Zawut Ƀuôn Yă