VOV4.Êđê-  Ti Hà Nội, Thượng tướng Phan Văn Giang, Khua phŭn bruă lĭng kahan mă leh bruă hŏng dŭm êpul êya, anôk bruă kơ hdră rơ̆ng kjăp klei êđăp ênang kơ gưl ruah Pô bi ala Quốc hội gưl XV lehanăn bi ala Hội đồng nhân dân dŭm gưl wưng thŭn 2021 – 2026. Ti anôk mă bruă, Thượng tướng Phan Văn Giang mtă kơ dŭm êpul êya, anôk bruă mđĭ hdră msir thâo klă klei dôk mâo, bi trông, kah mbha klei hâo hưn mơ̆ng dŭm êpul êya bruă; bi mklă, tĭng dlăng, đăo knăl boh klei mâo, boh nik mnêč jhat ƀai čiăng bi rai mơ̆ng phung roh. Dŭm êpul êya djŏ tuôm ksiêm dlăng kjăp krĭng wăl adiê, krĭng êa ksĭ, plao ksĭ, knông lăn lehanăn hlăm êlan mạng; mprăp dŭm êpul, kdrăp mnơ̆ng, nao hgŭm msir mghaih tŭ dưn dŭm klei mâo. Êpul lĭng kahan krơ̆ng kjăp hdră dôk gak răng, bi hgŭm hŏng dŭm êpul êya bruă hlăm lehanăn êngao lĭng kahan thâo klă klei mâo, răng mgang kluôm dhuôm hdră ruah khua. Mbĭt hŏng bruă hluê ngă kjăp hdră msir gang mkhư̆ klei ruă Covid 19, Thượng tướng Phan Văn Giang mtă kơ dŭm anôk bruă ngă jăk hdră mtô mblang, đru kơ phung knuă druh, lĭng kahan hluê ngă jăk klei dưi, bruă klam mơ̆ng sa čô mnuih ƀuôn sang nao hlăm hdră ruah khua./.

                                                    Pô mblang: H’Nêč Êñuôl