VOV4.Êđê - Tŭ ư asăp jak iêu mơ̆ng Khua phŭn bruă lĭng kahan Việt Nam, êpul bi ala lĭng kahan gưl dlông ala čar Cộng hòa Nhân dân Trung Hoa mâo thượng tướng Ngụy Phượng Hòa, Khua phŭn bruă lĭng kahan, ngă khua êpul hriê čhưn kơ Việt Nam mơ̆ng hruê 24 truh kơ hruê 27/4. Knăm drông dưi mkŏ mjing tlam hruê 25/4, ti Hà Nội, mâo thượng tướng Phan Văn Giang, Khua hlăm Phŭn bruă kđi čar, K’iăng khua bruă Đảng lĭng kahan gưl dlông, Khua phŭn bruă lĭng kahan Việt Nam gĭt gai.

Leh knăm drông, Êpul bi ala lĭng kahan gưl dlông dua ala čar hluê ngă leh klei bi trông. Thượng tướng Phan Văn Giang mñă klă, Đảng, Knŭk kna lehanăn Lĭng kahan yang ƀuôn Việt Nam bi myuôm nanao klei bi mjĕ jăk siam mâo mơ̆ng đưm lehanăn mtrŭt mđĭ klei bi mjĕ ƀĭng hgŭm phŭn kluôm dhuôm hŏng Trung Quốc. Thượng tướng Ngụy Phượng Hòa mñă, klei bi hgŭm bruă lĭng kahan plah wah Trung Quốc lehanăn Việt Nam jing sa hlăm dŭm bruă yuôm bhăn, đru mđĭ hĭn klei bi mjĕ hgŭm bruă jăk siam plah wah dua Đảng, Knŭk kna, kyua klei tŭ dưn kơ mnuih ƀuôn sang dua ala čar, kyua klei êđăp ênang, h’ĭt kjăp, đĭ kyar ti grăp ala čar ăt msĕ mơh hlăm krĭng lehanăn tar rŏng lăn./.

H Nêč pô mblang