VOV4.Êđê- Ti Hà Nội, Đaị tướng Tô Lâm, Khua phŭn bruă kahan ksiêm mâo leh mmông drông Khua bi ala Mi ti Việt Nam Daniel Kritenbrink nao kkuhjih wưng păn bruă ti Việt Nam. Khua phŭn bruă Tô Lâm hơêč hmưi kơ Daniel Kritenbrink bi leh jăk bruă knuă wưng păn bruă ti Việt Nam leh anăn mâo Khua mil čhil Mi mgơ̆ng asei ngă pô đru Khua phŭn bruă hŏng tač êngao Mi klam bruă ti Ngŏ Châu Á- Thái Bình Dương. Khua phŭn bruă Tô Lâm bi mni lač jăk kơ Khua bi ala Daniel Kritenbrink leh anăn mñă klă, Việt Nam čang hmăng lŏ dơ̆ng mđĭ klei bi hgŭm ƀĭng hgŭm kluôm ênŭm hŏng Mi hlăm tur knơ̆ng mpŭ klei êngiê, klei dưi, kluôm ênŭm lăn ala, kyua klei tŭ yang ƀuôn dua ala čar, đru mđĭ lar klei êđăp ênang, hơ̆it kjăp, bi hgŭm leh anăn mđĭ kyar ti krĭng wăl leh anăn dlông rŏng lăn. Khua phŭn bruă Tô Lâm čang hmăng, hlăm wưng kơ anăp, Mi đru kơ mnuih ƀuôn sang Việt Nam mâo vaccin gang mkhư̆ klei ruă Covid-19, bi hgŭm hŏng Knŭk kna Việt Nam hlăm gưl ba yua kdrăp mrâo, mkra mjing vaccin.

            Pô mblang: H’Zawut Ƀuôn Yă