VOV4.Êđê - Leh mjưh ruê̆ klei bi tuôm hŏng mnuih ƀuôn sang, tlam hruê 11/5, Khua Quốc hội Vương Đình Huệ mâo leh mmông mă bruă hŏng Anôk bruă Đảng ƀuôn prŏng Hải Phòng kơ hdră mprăp kơ klei ruah khua lehanăn boh tŭ hluê ngă bruă klam 4 mlan akŏ thŭn. Blŭ hrăm ti anôk mă bruă, Khua Quốc hội Vương Đình Huệ lač, ƀuôn prŏng Hải Phòng mprăp leh jăk kơ hdră ruah pô bi ala Quốc hội gưl XV lehanăn bi ala HĐND dŭm gưl wưng thŭn 2021 – 2026.

Hải Phòng mjưh ruê̆ leh bruă mkŏ mjing hdră bi tuôm kơ 15 čô mgơ̆ng ruah ti 3 êpul êya ruah khua čiăng mtrŭt mjhar hdră ruah khua, hdră ngă klă mngač, ngă phŭn mil pô, hŏng klei mĭn mrâo, dưi mkŏ mjing hluê hdră trực tuyến lehanăn bi tuôm anăp mta ti jih jang să, ƀuôn hgŭm, wăl krah, mđung asăp ti mmông anăn mtam, hưn hluê êlan internet. Hdră ngă anei ba wĭt leh klei tŭ dưn, truh kơ krĭng ƀuôn sang hlăm alŭ wăl. Phung mgơ̆ng ruah ăt ƀuh h’ĭt ai tiê hlăk dŭm hdră mtrŭt mjhar, klei blŭ mơ̆ng pô dưi hưn mthâo truh kơ jih jang mnuih ƀuôn sang. Boh nik, ƀuôn prŏng Hải Phòng ngă leh jăk hdră gang mkhư̆ klei ruă Covid 19, ară anei dưi ksiêm dlăng leh kjăp, amâo lui klei ruă anei tưp lar./.

H Nêč pô mblang