VOV4.Êđê- Tlam hruê 15/4, ti Sang bruă Quốc hội mkŏ mjing leh Klei bi kƀĭn mơ̆ng Dhar bruă kriê dlăng Quốc hội hŏng phung bi ala thơ̆ng kơ bruă ti Gưl dlông. Anei jing klei bi kƀĭn tal êlâo mơ̆ng Dhar bruă kriê dlăng bi tuôm hŏng phung bi ala Quốc hội thơ̆ng kơ bruă leh mâo ênŭm mnuih păn bruă. Khua Quốc hội Vương Đình Huệ gĭt gai Klei bi kbiƀn. Blŭ hrăm ti knăm pŏk klei bi kƀĭn, Khua Quốc hội Vương Đình Huệ lač klă, ti klei čih mkra Hdră mtrŭn ba mdah kơ Klei bi kƀĭn tal 11, Quốc hội gưl 14 kơ hdră mă bruă wưng thŭn 2016 – 2021 mơ̆ng Quốc hội, mâo 8 mta bruă mâo Quốc hội gưl 15 brei hluê ngă, rơ̆ng Quốc hội klă sĭt jing anôk bruă bi ala kdlưn hĭn mơ̆ng mnuih ƀuôn sang. Dhar bruă kriê dlăng Quốc hộibrei mđing hmư̆ klei blŭ mơ̆ng phung bi ala Quốc hội thơ̆ng kơ bruă, brei klei blŭ kơ bruă mlih mrâo, mđĭ hĭn hnơ̆ng thâo, klei tŭ dưn hdră ngă bruă mơ̆ng Quốc hội. Hlăm wưng ti anăp, Quốc hội srăng čih mkra hdră ngă bruă čiăng hluê ngă Hdră mtrŭn Klei bi kƀĭn tal 13 mơ̆ng Đảng. Hlăm anăn, srăng hluê ngă lu hdră mdê mdê, hŏng klei nao hgŭm mơ̆ng dŭm êpul êya anôk bruă lehanăn bi kčah wưng klă klơ̆ng. Hlăm wưng ti anăp, phung khua kiă kriê Quốc hội srăng mâo hruê mmông mă bruă klă klơ̆ng hŏng Êpul hgŭm djuê ana, hŏng grăp dhar bruă, anôk bruă mơ̆ng Quốc hội čih mkra hdră kčah, ba mdah hdră mtrŭn tă hdră êlan kơ bruă hluê ngă hdră bhiăn hlăm wưng ti anăp./.

                                                    Pô mblang: H’Nêč Êñuôl