VOV4.Êđê - Lŏ dơ̆ng hlăm gưl hiu ngă bruă ti dŭm čar krĭng Dap Mnai Krông Cửu Long, aguah mbrue (18/3), Khua Quốc hội Nguyễn Thị Kim Ngân, Khua kiă kriê êpul hgŭm klei ruah khua ala čar mă leh bruă hŏng êpul kiă kriê bruă ruah khua čar An Giang. Truh 5h tlam hrue 14/3, êpul bruă kiă kriê klei ruah khua čar An Giang mâo tŭ mă leh truh 15 hră mơar mơ̆ng mnuih amâo mgơ̆ng ruah pô bi ala Quốc hội lehanăn 110 hră mơar mgơ̆ng ruah pô bi ala Hội đồng nhân dân čar. Knơ̆ng bruă sang čư̆ êa gưl să hlăk ksiêm dlăng ênoh phung ruah khua djăp 18 thŭn kơ dlông hlăm alŭ wăl tui hlue mde bi krĭng mplĕ hră čiăng dăp ênoh mnuih nao ruah. Ară anei, hlăm čar An Giang ka mâo ôh klei bi kčŭt djŏ tuôm hŏng klei ruah khua. Bruă hâo hưn mtô mblang hlăm klei ruah khua mâo čar An Giang ngă leh hŏng lu hdră. Blŭ kiă kriê klei mă bruă, khua Quốc hội Nguyễn Thị Kim Ngân lač, An Giang ngă leh jăk bruă mkŏ mjing dŭm êpul ruah khua pô bi ala Hội Đồng nhân dân lehanăn sa ai hŏng 7 bruă čuăn mơ̆ng An Giang hlăm wưng kơ anăp, čang hmăng An Giang mprăp lehanăn mkŏ mjing jăk siam klei ruah khua bi ala Quốc hội lehanăn Hội đồng nhân dân djăp gưl ./.

Y-Khem pô mblang