VOV4.Êđê- Mmăt hruê 2/4, ti sang Quốc hội, Khua Quốc hội Vương Đình Huệ bi trông leh hluê êlan đĭng blŭ hŏng Khua Quốc hội Lào Saysomphone Phomvihane. H’êč hmưi kơ Saysomphone Phomvihane mâo Quốc hội Lào đăo knang ruah ngă Khua Quốc hội Lào gưl IX, Khua Quốc hội Vương Đình Huệ mñă klă: Việt Nam bi mni lehanăn mđing tal êlâo kơ klei bi mjĕ jăk siam hŏng Lao, dlăng anei jing bruă phŭn mâo klei tŭ yuôm hŏng dua ala čar, mprăp kah mbha lehanăn sa ai kluôm dhuôm hŏng phung khua kiă kriê lehanăn mnuih ƀuôn sang Lao hlăm hdră mkŏ mkra lăn čar Lao kjăp ktang, đĭ kyar.

Dua tĭng lŏ dŏng mkŏ mjing dŭm klei bi kƀĭn trông kñăm ksiêm dlăng kơ dŭm hdră bruă kreh knhâo, mkŏ mjing hdră mjuăt bi hriăm mđĭ klei thâo kơ phung bi ala Quốc hội, bi ala Hội đồng nhân dân gưl čar lehanăn phung thŏng kơ bruă mŏng Quốc hội Lào. Dua tĭng hrăm mbĭt ksiêm dlăng lehanăn mtrŭt mđĭ kyar hdră bi hgŭm hlăm bruă duh mkra, boh nik hlăm bruă mnia mblei, duh bi liê; mkŏ mjing hluê ngă dŭm klei kuôl kă plah wah dua knŭk kna maoa siñê bi mklă leh./.

Pô mblang: H’Nêč Êñuôl