VOV4.Êđê - Aguah hruê 17/5/2021, ti Sang Quốc hội, Khua Quốc hội Vương Đình Huệ mă leh bruă hŏng Anôk bruă kčĕ đru kơ klei mnuih ƀuôn sang čiăng hlăm Dhar bruă gĭt gai Quốc hội. Khua Quốc hội Vương Đình Huệ mñă klă, bruă anei klă klơ̆ng jing bruă tŭ drông mnuih ƀuôn sang hlăm wưng êgao đru leh kơ Dhar bruă gĭt gai Quốc hội hluê ngă bruă klam ksiêm dlăng, msir mghaih klei kčŭt hưn, klei akâo čiăng mơ̆ng mnuih ƀuôn sang dưi mâo leh boh tŭ dưn năng čih yap, mtrŭt mđĭ klei đua klam hlak mblang mơ̆ng dŭm anôk bruă, boh nik pô djă akŏ anôk bruă ti anăp klei kčŭt hưn, klei akâo čiăng mơ̆ng mnuih ƀuôn sang, mâo lu mnuih sa ai; đru mguôp hlăm klei tŭ jing mbĭt mơ̆ng Quốc hội gưl 14.

Hlăm wưng ti anăp, Anôk bruă anei brei bi mklă hdră ngă bruă phŭn, boh nik mơ̆ng ară anei truh kơ hruê ruah pô bi ala Quốc hội gưl 15 lehanăn bi ala Hội đồng nhân dân dŭm gưl wưng thŭn 2021-2026. Khua Quốc hội Vương Đình Huệ mñă, Anôk bruă kčĕ đru kơ klei mnuih ƀuôn sang čiăng brei čih mkra hdră ngă bruă kluôm kñăm mđĭ klei thâo, boh tŭ dưn hlăm wưng păn bruă ti anăp, ba mdah kơ Quốc hội gưl 15 čiăng hưn mthâo hdră ngă bruă mơ̆ng Đảng êpul Quốc hội hluê hŏng bruă lŏ čuê dŭm boh tŭ dưi mâo leh./.

H Nêč pô mblang