VOV4.Êđê- Tlam 22-4, mă bruă hŏng  Dhar bruă ngăn prăk knŭk kna mơ̆ng Quốc hội, Khua Quốc hội Vương Đình Huệ mtă bi leh hdră čih mkra hdră bhiăn kñăm mjing tur knơ̆ng hdră bhiăn sa anăn kơ bruă mlih mrâo, mđĭ klei tŭ dưn kriê dlăng ngăn prăk knŭk kna. Hlăm mmông mă bruă, Khua Quốc hội Vương Đình Huệ mtă kơ Dhar bruă ngăn prăk knŭk kna pral ksiêm dlăng boh klei mâo êlâo kơ bi mklă dŭm mta phŭn Dhar bruă dưi mbha, gĭt gai kơ boh klei ngăn prăk. Êlâo hĭn, jing hâo hưn klei ksiêm dlăng klei tŭ hluê ngă hdră êlan prăk knŭk kna 6 mlan akŏ thŭn anei, hưn mdah mbha prăk knŭk kna gưl dlông thŭn 2021 kơ dŭm Hdră kñăm ala čar, Hră čih Hdră mtrŭn kơ klei bhiăn, hnơ̆ng kčah leh anăn hnơ̆ng mbha prăk bi liê thŭn 2022. Khua Quốc hội mtă kơ Dhar bruă ngăn prăk mkŏ mjing dŭm êpul hiu ksiêm dlăng ngă bruă ksiêm dlăng nanao dŭm mta phŭn hưn mdah Quốc hội hlăm klei bi kƀĭn tal 1 leh anăn klei bi kƀĭn tal 2, Quốc hội gưl 15.

Pô mblang: H’Zawut Ƀuôn Yă