VOV4.Êđê - Hruê 10/5, ti kdriêk Tiên Lãng, Khua Quốc Hội Vương Đình Huệ mbĭt hŏng dŭm čô mgơ̆ng asei ngă pô bi ala Quốc Hội gưl 15 lŏ nao čuê kơ hdră êlan nao bi tuôm lehanăn mtrŭt mjhar bruă ruah khua ti anôk ruah khua mrô 3, ƀuôn prŏng Hải Phòng, hlăm anăn mâo dŭm kdriêk Kiến An, Dương Kinh, An Lão, Tiên Lãng lehanăn Vĩnh Bảo. Hlăm klei bi trông, phung mplĕ hră ti kdriêk Tiên Lãng sa ai hŏng dŭm hdră êlan bruă ngă mơ̆ng dŭm čô mgơ̆ng asei, lehanăn bi êdah klei đăo knang kơ dŭm čô mgơ̆ng asei.

Phung mplĕ hră hlăm kdriêk hmăng hmưi dŭm čô mgơ̆ng asei leh mâo klei dưi čuăn ruah srăng lŏ bi lar klei thâo pô, hŏng klei thâo mĭn, bruă klam jing pô bi ala Quốc Hội srăng jĕ giăm lehanăn hmư̆ klei blŭ mơ̆ng mnuih ƀuôn sang. Bi ala kơ dŭm čô mgơ̆ng asei ngă pô bi ala Quốc Hội ti anôk ruah khua mrô 3, Khua Quốc Hội Vương Đình Huệ mâo klei lač jăk, čih yap dŭm klei blŭ mguôp, bruă klam mơ̆ng dŭm čô mgơ̆ng asei. Mbĭt hŏng anăn lŏ mñă klă, tơdah mâo klei čuăn ruah srăng ngă jăk bruă klam jing pô bi ala, srăng ngă bi leh dŭm klei ƀuăn rơ̆ng, boh nĭk srăng jĕ giăm hŏng mnuih ƀuôn sang, jing kdrông dưi ba ƀoh blŭ, klei hmăng hmưi mơ̆ng dŭm čô mplĕ hră, mơ̆ng mnuih ƀuôn sang truh kơ Quốc Hội