VOV4.Êđê - Aguah mbrue (12/4), ti Hà Nội mkŏ mjing leh klei bi kƀĭn bi êdah bruă Quốc hội bi klă ruah mdưm Khua kiă kriê bruă tĭng mkă ngăn prăk knŭk kna wưng thŭn 2016 – 2021, lehanăn jao bruă anei kơ pô djŏ ruah. Bi ala kơ Êpul khua kiă kriê bruă Đảng êpul Quốc hội, Dhar bruă gĭt gai Quốc hội, Khua Quốc hội Vương Đình Huệ hơêč hmưi kơ khua Anôk bruă tĭng mkă ngăn prăk knŭk kna kơ Trần Sỹ thanh hŏng ênoh hră mplĕ lu. Khua Quốc hội Vương Đình Huệ đăo knang Trần Sỹ Thanh mbĭt hŏng jih jang phung knuă druh hlăm bruă Đảng lehanăn Anôk bruă tĭng mka ngăn prăk knŭk kna lŏ dơ̆ng kiă kriê bruă tĭng mkă ngăn prăk jing leh bruă yuôm bhăn mâo čoh čuăn. Khua Quốc hội Vương Đình Huệ mñă, bruă tĭng mkă ngăn prăk knŭk kna brei mâo klei bi mguôp kjăp hŏng dŭm dhar bruă djŏ tuôm kơ klei ksiêm dlăng, mghaih msir djăp mta klei ngă soh, mđĭ hĭng klei tŭ dưn bruă kdơ̆ng hŏng klei ƀơ̆ng ngăn, klei bi liê pliă plia, pral thâo ƀuh, mghaih msir mtam djăp mta klei soh čhuai, bruă ngă amâo mâo djŏ hlăm bruă tĭng mkă ngăn prăk lehanăn hlăm bruă kiă kriê, ba yua ngăn prăk knŭk kna./.

Y Khem pô mblang