VOV4.Êđê- Tlam bruê 16/4, Nguyễn Khắc Định, k’iăng khua kiă kriê Quốc Hội, khua bruă Đảng čar, khua êpul bi ala Quốc Hội čar Khánh Hòa gĭt gai leh klei bi kƀĭn trông bruă Đảng čar Khánh Hòa, hmư̆ dŭm klei hưn mthâo kơ dŭm bruă ngă, hdră êlan ti anôk bruă duh mkra Vân Phong leh anăn hdră êlan klei bhiăn kơ klei kiă kriê, dŭm hră êlan mđĭ kyar bruă duh mkra anei. Tui hlue klei bi êdah mơ̆ng dŭm anôk bruă đru kčĕ, anôk bruă duh mkra Vân Phong mâo kluôm ênŭm ênă hlăm ƀrô 150 000 ha, hlăm anăn anôk lăn lehanăn plao êa ksĭ hlăm ƀrô krah wah. Anôk bruă anei mâo klei akâo lŏ bi mŭt ênă mơ̆ng să Xuân Sơn, kdriêk Vạn Ninh hlăm ƀrô 3.500 ha lehanăn nao truh ti êa ksĭ hlăm ƀrô 1.500 ha. Nguyễn Khắc Định k’iăng khua kiă kriê Quốc Hội, khua bruă Đảng čar Khánh Hòa lač, dŭm anôk bruă nah gŭ, knơ̆ng bruă hlăm čar Khánh Hòa hnưm mâo klei mkŏ mjing bruă ngă bi mguôp hŏng knơ̆ng bruă kiă kriê anôk bruă duh mkra Vân Phong, yap hdră êlan bruă duh mkra Vân Phong jing hdră êlan mbĭt hlăm čar Khánh Hòa.

Pô mblang: Y-Khem Niê