VOV4.Êđê -   K’iăng Khua knŭk kna Trương Hoà Bình, K’iăng Khua êpul hgŭm ruah khua ala čar mrâo ksiêm dlăng bruă ruah khua bi ala Quốc hội gưl XV leh anăn HĐND dŭm gưl wưng thŭn 2021-2026 ti čar Đồng Tháp. Blŭ hrăm ti mmông mă bruă, K’iăng Khua Knŭk kna Trương Hoà Bình bi mni kơ bruă mprăp ruah khua mơ̆ng Đồng Tháp kƀĭn gĭt gai, mkŏ mjing pŏk ngă dŭm bruă ngă tliêr kjăp, mđrăm mbĭt, rơ̆ng djŏ hnơ̆ng leh anăn klei brei ngă.

Čiăng ktuê dlăng hdră kčah, djŏ hdră hluê si Klei bhiăn ruah khua, Hdră mtrŭn leh anăn dŭm hră mơar ktrâo lač mơ̆ng Êpul hgŭm ruah khua ala čar. K’iăng Khua Knŭk kna mñăm klă, hlăm wưng mơ̆ng ară anei truh hruê ruah khua amâo lŏ sui ôh, kyua anăn čar Đồng Tháp bi lŏ dơ̆ng mđĭ bruă hâo hưn, dlăng hruê ruah khua jing knăm mơak jing yang ƀuôn, mđing hâo hưn, mtô mblang hlăm bruă nah gŭ, grăp gŏ sang, mnuih ƀuôn sang kơ klei bhiăn leh anăn hnơ̆ng yuôm bhăn mơ̆ng klei ruah khua.

H Zawut pô mblang