VOV4.Êđê -  Aguah hruê 31/3, ti Hà Nội, mkŏ mjing Klei bi kƀĭn Êpul hgŭm phung mniê ngă bruă mnia blei Việt Nam (VAWE) tal 2. K’iăng Khua Knŭk kna Trương Hoà Bình nao leh anăn blŭ hrăm gĭt gai Klei bi kƀĭn. Hluê si klei ksiêm yap anei, Việt Nam mâo êbeh 30% phung mniê gĭt gai dŭm anôk bruă mnia blei, leh anăn anei jinh sa hnơ̆ng prŏng. Hlăm wưng êgao, hlăm bruă mkra mjing mnia blei, phung mniê pral msir mgaih klei dleh dlan hlăm anôk bruă pô, amâo dôk guôn klei đru mơ̆ng nah êngao ôh… Blŭ hrăm hlăm anôk bi kƀŭn, K’iăng Khua knŭk kna Trương Hòa Bình bi mni kơ Klei bi kƀĭn tal 2 yuôm bhăn mơ̆ng phung mniê ngă bruă mnia blei Việt Nam; mtă kơ Êpul hgŭm leh anăn phung mniê ngă bruă mnia blei brei hâo hưn, mtrŭt mjhar phung ngă bruă mnia blei leh anăn phung mniê ngă bruă mnia blei ngă bruă hlăm jar hdră bhiăn, hlue ngă djŏ hdră bhiăn, bruă klam hŏng Knŭk kna leh anăn rơ̆ng klei dưi kơ mnuih mă bruă, mkra mjing, mnia blei mđing truh mđĭ kyar hơĭt kjăp leh anăn mkŏ mjing knhuah phung mniê ngă bruă mnia blei jiă kma klei jăk siam leh anăn anak mnuih Việt Nam.

H Zawut pô mblang