VOV4.Êđê - Aguah ƀruê 12/5, k’iăng khua knŭk kna Vũ Đức Đam, khua êpul gĭt gai ala čar bruă gang mkhư̆ klei ruă tưp Covid-19 mâo leh klei gĭt gai klei kƀĭn trực tuyên mơ̆ng êpul gĭt gai ala čar hŏng 3 alŭ wăl Đà Nẵng, Bắc Ninh, Bắc Giang leh mâo klei čih yap mâo 100 čô mnuih mâo klei ruă tưp Covid-19 jing dŭm čô mă bruă hlăm dŭm anôk tuh tia. K’iăng khua knŭk kna Vũ Đức Đam mâo klei mtă Đà Nẵng, Bắc Ninh, Bắc Giang srăng rơ̆ng kơ bruă mkŏ mjing lehanăn gang mkhư̆ klei ruă tưp Covid-19, ti anôk mâo klei ruă srăng ngă klei čuăl krĭng truh kơ anăn lehanăn tui ngă hdră bi ktlah, rơ̆ng kơ klei amâo srăng mâo klei đĭ lar klei ruă hlăm dŭm anôk bi ktlah. Anôk mă bruă hlăm dŭm anôk tuh tia jing anôk mă bruă krĭp, mâo lu mnuih, kyuanăn klei hyưt đĭ lar klei ruă jing lu êdi. K’iăng khua knŭk kna mtă kơ dŭm čar, ƀuôn prŏng amâo dưi ngă klei ngơi mang, čiăng iêu mthưr wăt kơ bruă kđi čar srăng nao hgŭm hlăm bruă anei. Amâo dưi lui kơ knŏng hjăn dhar bruă mdrao mgŭn hlăm bruă gang mkhư̆ klei ruă tưp Covid-19.