VOV4.Êđê - Kiă kriê êpul bruă ala čar mdrơ̆ng hŏng klei ruă tưp Covid 19 mkŏ mjing leh aguah mbrue (10/5), ti anôk bruă knŭk kna, k’iăng khua knŭk kna Vũ Đức Đam mtă kơ jih jang dŭm boh čar, ƀuôn prŏng mđing hĭn kơ bruă mdrơ̆ng hŏng klei ruă tưp ti dŭm anôk duh mkra, sang êa drao, sang mnia boh nik nak, êjai Phŭn bruă mdrao mgŭn yap ênoh mnuih tưp djŏ đĭ pral snăk kbiă hriê mơ̆ng dŭm anôk lu mnuih, hlăm anôk krĭp. Ară anei mâo leh 26 boh čar, ƀuôn prŏng hlăk dôk tưp djŏ klei ruă covid 19. klei ruă tưp anei anăp srăng sui, ka thâo klă ôh êla srăng jih, knơ̆ng bruă sang čư̆ êa dŭm čar, ƀuôn prŏng hyuă kjăp hĭn bruă ksiêm dlăng, mtrŭt dŭm anôk bruă duh mkra hlăm alŭ wăl ngă bi kjăp hdră mtrŭn mơ̆ng Dhar bruă ala čar kiă kriê kơ bruă mdrơ̆ng hŏng klei ruă tưp, lehanăn ksiêm wĭt hnơ̆ng bi mtưp kơ mnuih ngă bruă hlăm anôk dôk mă bruă, lehanăn hlăm sang phung mă bruă jưh dôk. Hŏng dŭm anôk ênưih mtưp djŏ klei ruă msĕ si ti sang êa drao, sang mnia, bi hlue ngă kjăp mta mtrŭn gang mkhư̆ klei ruă tưp mâo phŭn bruă mdrao mgŭn mtrŭn leh./.

Y Khem pô mblang