VOV4.Êđê -  Aguah hruê 26/3, ti Sang hră ksiêm hriăm kơ bruă mdrao mgŭn lĭng kahan – Phŭn bruă lĭng kahan, K’iăng khua knŭk kna Vũ Đức Đam, Khua anôk bruă ala čar gĭt gai hdră gang mkhư̆ klei ruă Covid 19 nao čuă, mtrŭt mđĭ ai êpul nao hgŭm ksiêm hriăm lehanăn phung ba anăp nao tlŏ aruăt tal 2, wưng 2 Vaccine Nano Covax. Hluê si Nai prŏng, nai prĭn Đỗ Quyết, Khua Sang hră ksiêm hriăm kơ bruă mdrao mgŭn lĭng kahan, truh ară anei, wưng ksiêm dlăng, mkra mjing vaccine Nano Covax dưi bi hrŏ truh kơ tuič hnơ̆ng ƀiădah ăt rŏng kjăp klei êđăp ênang, kreh knhâo kñăm dưi mâo hdră kñăm hnưm mâo vaccine êđăp ênang, tŭ dưn kơ mnuih Việt. Gưl tlŏ vaccine gang mkhư̆ Covid 19 Nano Covax wưng 2 mâo 560 čô ba anăp siñe bi mklă nao tlŏ, pŏk mlar mnuih nao tlŏ mŏng 18 truh kơ êbeh 60 thŭn, hlăm anăn mâo ƀiă mnuih mâo klei ruă amâo ktrŏ mŏng êlâo. Wưng tal 3 dưi lông ba yua kơ êbeh 10 êbâo čô, mŏng anăn, mâo tur knơ̆ng kreh knhâo čiăng dưi bi mklă Việt Nam srăng hnưm dưi mâo vaccine, tĭng hlăm mlan 9 thŭn anei./.

H Nêč pô mblang