VOV4.Êđê- Lŏ dơ̆ng gưl nao mă bruă ti čar Quảng Nam, tlam hruê 9/3, K’iăng khua lăn čar Đặng Thị Ngọc Thịnh nao čuă, mđup brei mnơ̆ng kơ mnuih mă bruă ti Wăl tuh tia mkra mjing Điện Nam - Điện Ngọc lehanăn Kđông kahan răng mgang knông lăn Cửa Đại hlăm Knơ̆ng gĭt gai lĭng kahan răng mgang knông lăn čar Quảng Nam. K’iăng khua lăn čar Đặng Thị Ngọc Thịnh mñă klă, lĭng kahan răng mgang knông lăn jing êpul êya ba akŏ hlăm hdră gang mkhư̆ klei ruă Covid 19, čang hmăng phung knuă druh, lĭng kahan kđông kahan răng mgang knông lăn Cửa Đại srăng mđĭ lar knhuah gru Awa Hô, răng mgang kjăp klei dưi kiă kriê kluôm ênŭm krĭng lăn, răng mgang kjăp krĭng êa ksĭ, plao ksĭ.

K’iăng khua lăn čar Đặng Thị Ngọc Thịnh ăt nao čuă, mđup brei 100 hnư mnơ̆ng kơ mnuih mă bruă lehanăn 50 hnư mnơ̆ng kơ anak aneh mnuih mă bruă mâo klei hdĭ dleh dlan ti Wăl tuh tia mkra mjing Điện Nam - Điện Ngọc, wăl krah Điện Bàn. K’iăng khua lăn čar Đặng Thị Ngọc Thịnh čang hmăng phung khua kiă kriê čả Quảng Nam, Anôk kriê dlăng wăl tuh tia mkra mjing, dŭm gưl bruă công đoàn kreh nao mđing dlăng nanao klei hdĭp mơ̆ng mnuih mă bruă./.

Pô mblang:  H’Nê] Ê`uôl