VOV4.Êđê - Tlam hruê 12-5, Êpul ksiêm dlăng bruă ruah khua mơ̆ng Dhar bruă Quốc hội, Êpul hgŭm ruah khua ala čar mâo K’iăng khuă lăn čar Võ Thị Ánh Xuân ngă khua êpul nao ksiêm dlăng boh sĭt ngă bruă mprăp ruah khua dŭm alŭ wăl ti ƀuôn prŏng Gia Nghiã, čar Dak Nông. Ară anei ƀuôn prŏng Gia Nghiã mkŏ mjing leh 59 alŭ wăl mplĕ hră, hŏng 8.560 čô phung bi ala ruah khua.

Alŭ wăl mâo leh hdră klă klơ̆ng rơ̆ng klei êđăp ênang ala ƀuôn, gang mkhư̆ klei ruă tưp êlâo, hlăm leh anăn êdei kơ ruah khua. Mơ̆ng bruă ksiêm dlăng, K’iăng Khua lăn čar Võ Thị Ánh Xuân bi mni klei gĭr mơ̆ng ƀuôn prŏng Gia Nghiã hlăm bruă hmao pŏk ngă, djŏ wưng kčah dŭm bruă mprăp ruah khua. Mbĭt anăn čang hmăng dŭm alŭ wăl brei hluê ngă bi jăk bruă gang mkhư̆ klei ruă Covid-19 rơ̆ng êđăp ênang kơ phung bi ala leh anăn yang ƀuôn, čiăng hruê ruah khua jing knăm mơak yang ƀuôn.

H Zawut pô mblang