VOV4.Êđê- Aguah 14/5, Êpul ksiêm dlăng bruă ruah khua ala čar mâo Khua hlăm bruă Đảng gưl dlông, K’iăng Khua lăn čar, K’iăng khua êpul hgŭm ruah khua Võ Thị Ánh Xuân ngă khua, mâo leh mmông ksiêm dlăng bruă ruah khua ti Lâm Đồng. Truh wưng anei, bruă mprăp ruah ti čar Lâm Đồng dưi ngă djŏ hdră leh anăn wưng kčah.

Blŭ hrăm hlăm mmông mă bruă, K’iăng Khua lăn čar Võ Thị Ánh Xuân bi mni kơ bruă mprăp ruah khua kơ djăp mta bruă ti čar Lâm Đồng: mbĭt anăn mtă, brei Lâm Đồng lŏ mđĭ ktang bruă hâo hưn mtô mblang kơ klei ruah khua kơ boh êlam, boh nik hlăm krĭng taoh kbưi, krĭng mnuih djuê ƀiă, mbha êpul hlăm Anôk bruă gĭt gai Knơ̆ng bruă ruah khua ksiêm dlăng alŭ wăl mơ̆ng hruê anei čiăng hmao msir mgaih dŭm bruă tơdah mâo, rơ̆ng mprăp djăp ênŭm dŭm hdră kơ hruê ruah khua mkŏ mjing êđăp ênang leh anăn djŏ hdră kčah.

Pô mblang: H’Zawut Ƀuôn Yă