VOV4.Êđê - Aguah hruê 7/5, Êpul mă bruă mơ̆ng Êpul hgŭm ruah khua ala čar mâo K’iăng khua Quốc hội Đỗ Bá Tỵ, Khua hlăm Êpul hgŭm ruah khua ala čar, Khua anôk bruă răng mgang klei êđăp ênang ala ƀuôn lehanăn bruă mdrao mgŭn ngă Khua êpul mă leh bruă hŏng Dhar bruă ruah khua čar Khánh Hoà nao ksiêm dlăng hdră mprăp kơ gưl ruah Pô bi ala Quốc hội gưl XV lehanăn bi ala HĐND dŭm gưl wưng thŭn 2021 – 2026. Hluê si Dhar bruă ruah khua čar Khánh Hoà, kluôm čar mâo êbeh 970 êbâo čô mnuih ƀuôn sang, êbeh 960 anôk mplĕ hră. Čar mkŏ mjing leh 3 êpul êya ruah pô bi ala Quốc hội gưl XV, 14 êpul êya ruah pô bi ala HĐND čar. K’iăng khua Quốc hội Đỗ Bá Tỵ mtă čiăng kơ gưl ruah Pô bi ala Quốc hội lehanăn HĐND dŭm gưl rơ̆ng klei êđăp ênang, ngă phŭn mil pô, mtăp mđơr, djŏ hdră bhiăn, mkiêt mkriêm, Dhar bruă ruah khua čar brei ksiêm dlăng nanao hdră ruah khua ti alŭ wăl, thâo klă ênoh mnuih ƀuôn sang. Ti anăp klei mâo dleh dưi ksiêm dlăng mơ̆ng klei ruă Covid 19, K’iăng khua Quốc hội Đỗ Bá Tỵ mtă kơ čar Khánh Hòa pŏk ngă kjăp hdră msir gang mkhư̆ klei ruă tưp./.

H’Nêč pô mblang