VOV4.Êđê- Hruê 2/4, Anôk kiă kriê bruă Đảng čar Kon Tum gưl XVI mkŏ mjing leh Klei bi kƀĭn tal 3. Ti anôk bi kƀĭn, phung bi ala bi trông čhai, mă klei blŭ hŏng hră hưn mdah tĭng dlăng bruă hluê ngă hdră mđĭ kyar bruă duh mkra – ala ƀuôn, bruă răng mgang klei êđăp ênang, mkŏ mkra Đảng lehanăn anôk bruă kđi čar 3 mlan gưl 1 thŭn 2021. Blŭ hrăm klah čŭn ti anôk bi kƀĭn, Khua bruă Đảng čar bi mni kơ dŭm boh tŭ êdah kdlưn dưi maoa hlăm 3 mlan gưl 1. Hŏng bruă klam hlăm 3 mlan gưl 2, Khua bruă Đảng čar mtă brei mđing tal êlâo, kƀĭn kơ hdră iêu mthưr klei duh bi liê, gĭt gai nanao, ruh mtlaih jih klei dleh dlan, mjing klei găl kơ phung duh bi liê hluê ngă bruă. Bruă Đảng čar mtă kơ Anôk bruă knuă druh mŏng Đảng, anôk bruă sang čư̆ êa čar gĭr kiă kriê, gĭt gai dŭm kdriêk, ƀuôn prŏng, dŭm knơ̆ng, dhar bruă ba yua jih ai dưi, klei mâo, hluê ngă jăk, êdah kdlưn dŭm hnơ̆ng čuăn bruă duh mkra, ala ƀuôn thŭn 2021./.

Pô mblang: H’Nêč Êñuôl