VOV4.Êđê - Aguah anei, hruê 15/3, ti Hà Nội, mphŭn pŏk Klei bi kƀĭn tal 54 mơ̆ng Dhar bruă gĭt gai Quốc hội. Mkŏ mjing hlăm sa hruê, bruă năng mđing jing Dhar bruă gĭt gai Quốc hội brei klei blŭ kơ hdră mprăp kơ klei bi kƀĭn tal 11, Quốc hội gưl 14 lehanăn hdră bruă knuă druh čiăng ba mdah kơ Quốc hội. Ti anôk bi kƀĭn gưl dlông tal 2, gưl 13 mrâo mjưh ruê̆ aguah hruê 9/3, Gưl dlông mplĕ hră hră hưn mthâo pô mgơ̆ng ruah ngă Khua lăn čar, Khua knŭk kna, Khua Quốc hội jing phung khua kiă kriê phŭn mơ̆ng lăn čar hŏng ênoh hră mplĕ lu, Phŭn bruă kđi car hưn mthâo akâo leh klei blŭ mơ̆ng Gưl dlông êlâo kơ Phŭn bruă kđi car klă klơ̆ng hưn mthâo pô mgơ̆ng ruah ti dŭm anôk bruă mkăn čiăng kơ Quốc hội ksiêm dlăng, ruah lehanăn bi mklă hluê si Hdră bhiăn phŭn lehanăn klei bhiăn ala čar. Ăt ti anôk bi kƀĭn tal 54 anei, Dhar bruă gĭt gai Quốc hội brei leh klei blŭ kơ bruă hưn mthâo hdră mă bruă gưl 14 mơ̆ng Quốc hội, Dhar bruă gĭt gai Quốc hội. Dŭm boh tŭ bruă ksiêm dlăng klei akâo čiăng mơ̆ng mnuih ƀuôn sang ba m’ĭt kơ Klei bi kƀĭn tal 10, Quốc hội gưl 14; ksiêm wĭt klei blŭ, klei akâo čiăng mơ̆ng mnuih ƀuôn sang ba m’ĭt kơ Klei bi kƀŭn tal 11, Quốc hội gưl 14./.

H’Nêč pô mblang