VOV4.Êđê - Mrâo anei, bruă Đoàn êdam êra Cộng sản Hồ Chí Minh krĭng Lăn dap kngư mkŏ mjing leh Klei bi lông phung êdam êra mĭn mrâo lehanăn bi mni kơ dŭm anôk bruă Đoàn kjăp ktang, bi mni kơ phung khua bruă Đoàn êdah kdlưn kluôm ala krĭng lăn dap kngư thŭn 2021. Nao hlăm hdră anei, mâo pô bi ala Anôk kiă kriê bruă Đoàn êdam êra Cộng sản Hồ Chí Minh 5 čar krĭng lăn dap kngư lehanăn êbeh 100 cô bi ala jing phung khua bruă Đoàn, êdam êra mbruă bruă duh mkra, phung êdam êra êdah kdlưn hlăm hdră mphŭn čô̆ kơ bruă mrâo ti dŭm čar hlăm krĭng. Anei jing hdră bruă kkuh m’ak knăm bi hdơrr 90 thŭn hruê mkŏ mjing bruă Đoàn êdam êra Cộng sản Hồ Chí Minh 26/3.

Hdră anei srăng mkŏ mjing dŭm bruă msĕ si: Klei kƀĭn trông ‘’Bi blŭ hrăm kơ dŭm hdră msir mtrŭt mđĭ hdră mphŭn čô̆ kơ bruă mrâo’’, đru kơ phung đoàn viên êdam êra dŭm anôk bruă bi trông čhai, kah mbha klei thâo kơ gru hmô jăk hlăm hdră mphŭn čô̆ kơ bruă ti alŭ wăl ăt msĕ mơh kơ hdră mđĭ kyar anôk bruă duh mkra mphŭn čô̆ kơ bruă kñăm ba mdah dŭm hdră msir mtrŭt mđĭ hdră mphŭn čô̆ kơ bruă. Ƀri gưl anei, bi mni leh kơ 10 čô ngă bruă duh mkra mda aseu êdah kdlưn ti 5 čar krĭng Lăn dap kngư./.

H’Nêč pô mblang