VOV4.Êđê -  Ƀri hlăm wưng Nguyễn Xuân Phúc dưi mâo klei čuăn ruah jing khua lăn čar ala čar yang ƀuôn ngă phŭn êngiê Việt Nam, tlam hruê 5/4, khua gĭt gai Đảng, khua lăn čar ala čar yang ƀuôn ngă phŭn Lào Thounglun Sisolith mâo hră mơĭt lehanăn klei blŭ hrăm hlăm đĭng blŭ kơ klei hơêč hmưi. Hlăm hră hơêč hmưi mơ̆ng khua gĭt gai Đảng, khua lăn čar ala čar Lào mâo klei đăo knang, hŏng klei thâo, klei đăo knang mơ̆ng mnuih ƀuôn sang lehanăn dŭm klei thâo hlăm klei mă bruă mơ̆ng pô, khua lăn čar Nguyễn Xuân Phúc hŏng êpul khua kiă kriê srăng dưi ba ala čar Việt Nam truh kơ dŭm klei dưi prŏng hĭn, dưi ngă hdră mtrŭn mơ̆ng klei kƀĭn prŏng kluôm tal XIII mơ̆ng Đảng cộng sản Việt Nam. Khua knŭk kna Trung Quốc Lý Khắc Cường ăt mâo klei blŭ hlăm đĭng blŭ mơĭt klei hơêč hmưi kơ khua knŭk kna Phạm Minh Chính. Khua knŭk kna Trung Quốc mñă klă srăng gĭr hlăm klei mkŏ mjing klei bi mguôp mâo klei dưi, mâo klei jăk kơ jih dua ala čar, đru hlăm klei êrô êbat 2 ala čar jĕ giăm Trung Quốc - Việt Nam. Ăt hruê anăn khua knŭk kna Nhật Bản Suga Yoshihide mâo klei blŭ hơêč hmưi kơ khua lăn čar Nguyễn Xuân Phúc leh anăn khua knŭk kna Phạm Minh Chính.