VOV4.Êđê- Hruê 27/4 khua phŭn bruă hŏng tač êngao Bùi Thanh Sơn mâo leh klei blŭ hrăm hlăm đĭng blŭ hŏng khua phŭn bruă hŏng tač êngao Nga Sergei Lavrov. Hlăm klei blŭ hrăm anăn khua phŭn bruă hŏng tač êngao Nga Sergei Lavrov mâo klei blŭ hơêč hmưi kơ khua phŭn bruă hŏng tač êngao Bùi Thanh Sơn dưi mâo klei čuăn ruah jing khua phŭn bruă hŏng tač êngao Việt Nam. Khua phŭn bruă hŏng tač êngao Nga Sergei Lavrov ăt lŏ mâo klei hơêč hmưi kơ dŭm klei dưi hlăm bruă hŏng tač êngao mrâo anei mơ̆ng ala čar Việt Nam. Hlăm bruă dưi bi leh bruă klam jing khua kiă kriê ASEAN thŭn 2020 leh anăn khua kiă kriê djŏ tuôr Êpul răng mgang klei êđăp ênang Liên Hợp Quốc wưng thŭn 2020-2021. Čih yap yuôm bhăn bruă klam knư̆ hruê knư̆ đĭ mơ̆ng Việt Nam hlăm alŭ wăl leh anăn tar rŏng lăn. 2 čô khua phŭn bruă hŏng tač êngao mâo klei hrăm mbĭt bi mguôp Việt Nam - Nga, boh nĭk hlăm bruă gang mkhư̆ klei ruă tưp Covid-19 ăt msĕ si klei bi mguôp mơ̆ng 2 phŭn bruă hŏng tač êngao. Klei bi mguôp 2 ala čar hlăm lu hdră êlan, hlăm anăn mâo Êpul răng mgang klei êđăp ênang Liên Hợp Quốc leh anăn ASEAN. Dua čô khua phŭn bruă hŏng tač êngao bi êdah klei hmăng hmưi srăng mtrŭt mjhar jăk dŭm bruă ngă hlăm 5 klei bi mguôp Việt Nam - Nga ti thŭn 2021.

Pô mblang: Y-Khem Niê