VOV4.Êđê - Tui si knơ̆ng bruă pui kmlă čar Daklak hưn, hlăm wưng giăm anei, anôk bruă kiă kriê pui kmlă mnuih yua pui kwar Krah mâo tŭ mă leh 9 blư̆ klei mnuih yua pui iêu hưn lač kơ bruă tuôm hŏng klei juă nư prăk pui mơ̆ng dŭm mrô đĭng blŭ djă hiu. Ti Daklak, mâo leh klei iêu đĭng blŭ lačdah juă nư prăk pui truh 50 êklăk prăk, mčhĭ lač pui bi mkĕ ti tluôn kŏngtơr pui, lehanăn arưp bi mhuĭ tơdah amâo mâo nao tla ôh prăk anăn srăng khăt pui kmlă. leh nao bi mklă, anei jing jih jang klei iêu duah mgưt hŏng mnuih ngă bruă pui kmlă čiăng duah mplư.

Dhar bruă pui kmlă mâo klei mtă kơ jih jang mnuih yua pui brei mâo klei răng, ñĕ kơ phung duah mplư. Tơdah mâo klei iêu lačdah juă nư prăk pui, snăn mnuih yua pui bi hưn mtam hŏng tổng đài mrô 19001909 čiăng pral mâo klei mghaih msir. Mnuih yua pui knŏng tŭ mă ya mta klei mtă, klei hưn mơ̆ng dŭm êlan msĕ si SMS, email, website mơ̆ng anôk bruă pui kmlă đuič, hŏng mrô tổng đài jing 19001909; lehanăn đăm brei ôh prăk kơ mnuih amâo mâo kral amâodah kăm dưi mơĭt rei prăk tơdah ka bi klă nik ôh jih klei anăn./.

Y Khem pô mblang