Ti anôk ngă hră mơar Knŭk kna să Trường Xuân (čar Lâm Đồng), klei yăl dliê kơ klei mlih mrô kčưm mơ̆ng sa boh đĭng blŭ ti kngan sa čô knuă druh mda asei. Nguyễn Đức Anh Tuấn, knuă druh klam bruă hưn mthâo mrâo mrang mơ̆ng adŭ bruă Dhar kreh - ala ƀuôn dôk gưl đĭng blŭ. Kkiêng thŭn 1999, Tuấn jing knuă druh mda asei hriê kơ prŏng hŏng internet leh anăn kdrăp mrâo. Ƀiădah klei yuôm bhăn hĭn mơ̆ng Tuấn jing mrâo kdrăp mrâo pô čiăng msir boh klei ti sa să krĭng 3 dleh dlan.

Kâo dôk mkŏ mjing kơ să Trường Xuân sa mini app hlăm zalo čiăng mlih mrâo hră mơar Knŭk kna. Hluê si klei mĭn đru kơ mnuih ƀuôn sang jăk găl hĭn. Kyua ară anei jih jang mnuih ƀuôn sang mâo leh sơăi đĭng blŭ thâo mĭn, yua zalo lu leh, êjai hriê ti să Trường Xuân, ruah mini app srăng ênưih leh anăn găl hĭn.”

Kah mbha êjai Tuấn pŏk êjai mini app ñu mkŏ mjing, dưm hlăm zalo. Dlăng ƀuh ênưih ƀiădah klei ba yua jing klă sĭt čiăng êdi hŏng mnuih ƀuôn sang krĭng čư̆ čhiăng. Knŏng gư̆ mă ƀiă, mnuih ƀuôn sang dưi mkŏ hŏng bruă Knŭk kna ala čar, dlăng hră mơar, ngă hră kkiêng, hră jưh dôk.

Lê Xuân Thuận, khua Bruă sang čư̆ êa să Trường Xuân brei thâo, mơ̆ng mini app mâo knuă druh mda asei mkŏ mjing, să lông ba yua hlăm bruă Knŭk kna ti nah gŭ. nao mbĭt hŏng anăn, să lông ngă gru hmô êpul mlih mrô êpul êya ti 9 ƀuôn kbưi hŏng wăl krah. Êjai ƀuh boh tŭ dưn, să srăng pŏk mlar truh ti jih jang 19 alŭ ƀuôn. Hlăm boh sĭt alŭ wăl prŏng, mnuih ƀuôn sang ƀiă, anei dưi dlăng jing hdră găl guôp čiăng ba klei mlih mrô truh hŏng giăm mnuih ƀuôn sang hĭn.

“Ti să mâo sa êpul mda asei, pô bi êdah klei mĭn mlih mrô êpul êla čiăng kơ mnuih ƀuôn sang dôk sa anôk dưi ngă bruă Knŭk kna online hŏng đĭng blŭ amâodah măi tĭnh, pô dưm dŭm mta bruă ênưih hĭn đuč. Ară anei mnuih ƀuôn sang yua lu hĭn jing zalo, pô srăng mă yua zalo mkŏ mjing app găl guôp. Mơ̆ng anăn, Tuấn mkŏ mjing app anei leh anăn pô kuôl kă hŏng zalo sa blư̆ jing 20 êklăk prăk, mă mơ̆ng ênoh prăk hdră mtrŭn mrô 57”.

Mmông mmăt, ti sa sang huă ƀơ̆ng alŭ 1 (să Trường Xuân, čar Lâm Đồng) mâo sa êpul bi mlih mrô ala ƀuôn dôk ngă bruă. Sang huă ƀơ̆ng mdei leh mơ̆ng ưm ƀiădah hlăm lam ăt kwang klei blŭ tlao. Mâo dŭm čô mnuih ƀuôn sang dôk dlăng hlăm đĭng blŭ, pô anei mtô mŭt hlăm app, pô mđung hră mơar, pô hriăm kơ klei ksiêm dlăng hră mơar. Dương Thị Yến Thủy, mnuih ƀuôn sang alŭ 2 hriê hriăm čiăng  ngă hră gŏ êsei kơ anak mniê.

“Kâo hriê brei Khua êpul đru mtô ngă hră gŏ êsei kơ anak kâo. Hră gŏ êsei hđăp hŏng hră mrâo ăt bi djŏ tuôm, kâo brei diñu lăm hĕ sa kdrêč. Mphŭn nao amâo thâo bĭt êlan ôh, kyua mâo diñu mtô ƀrư̆ ƀrưa ară anei thâo ngă leh.”

Pô mtô kơ mnuih ƀuôn sang jing ayŏng Thân Thanh Chương, khua êpul mlih mrô ala ƀuôn alŭ 2. Ñu djă đĭng blŭ ngă bi hmô, hlăk mblang, leh anăn mrô ƀrư̆ ƀrư̆ kơ mnuih ƀuôn sang. Gru hmô anei bi mâo klei hriăm jăk êdi hlăm êpul êya.

“Êpul mđing hmư̆ leh anăn lŏ mtô kơ dŭm êpul bruă msĕ si êpul bruă êdam êra, dhar bruă mặt trận, dŭm êpul bruă, leh anăn ƀrư̆ ƀrư̆ truh hŏng mnuih ƀuôn sang mâo klei čiăng. Phung thâo mtô kơ phung ka thâo, bi lar ƀrư̆ ƀrư̆, pô mtô đuč amâo djŏ hlŏng ngă brei ôh, brei mnuih ƀuôn sang čŏng ngă leh anăn jih jang thâo sơăi, bi lar kdrăp mrâo mrang mrô truh kơ jih jang.”

Amai Lê Anh Tiến, knhuă druh hưn mthâo mrâo mrang adŭ bruă dhar kreh - yang ƀuôn să Trường Xuân brei thâo, ênoh bruă mơ̆ng knuă druh ară anei lu sơnăk, êjai mnuih mă bruă knŏng ƀiă. Kyuanăn, dŭm êpul mlih mrô yang ƀuôn dôk jing kngan mduê dlông đru msir lu bruă mơ̆ng nah gŭ. Hluê si amai Tiến, êjai mnuih ƀuôn sang thâo ngă, srăng thâo bi đru hdơ̆ng pô, mmông anăn klei mlih mrô klă sĭt nao hlăm klei hdĭp:

“Dŭm êpul mlih mrô ară anei hur har êjai đru kơ mnuih ƀuôn sang. Mphŭn kčưm ƀuh boh tŭ dưn jăk êdi. Knŏng êbeh sa hruê kăm 9 alŭ, ƀuôn mâo êbeh 118 gưl čô mnuih ƀuôn sang hriê akâo đru, mtô ngă dŭm hră mơar online. Mâo leh lu mnuih dưi mâo boh tŭ dưn.”

Khădah mâo lu klei dleh dlan kơ bruă mkŏ mkra, ai dưi leh anăn anak mnuih, ƀiădah klei găl hĭn mơ̆ng să Trường Xuân, čar Lâm Đồng jing mâo êpul knuă druh mda asei, khăp kơ bruă, bi mlih mrâo. Hluê ngă hdră mtrŭn mrô 57 mơ̆ng Phŭn bruă kđi čar srăng jing hdră bruă sui. Ƀiădah klei yuôm bhăn hĭn jing gưl să dưi bi mlih klei mĭn, jhŏng mĭn, jhŏng ngă leh anăn lông ngă dŭm hdră bruă mrâo. Êjai gưl dlông leh anăn čar lŏ mâo thiăm hdră êlan găl guôp kơ ai dưi, ngăn prăk leh anăn mnuih mă bruă, gưl să klă sĭt jing anôk giăm hŏng mnuih ƀuôn sang, msir jăk hĭn dŭm klei čiăng mơ̆ng mnuih ƀuôn sang./.