Hâo hưn kơ ktuê êlan dơ̆ng êran pral mrâo mkŏ mơ̆ng Pleiku găn Ƀuôn Ama Thuôt truh ti Gia Nghĩa, dôk mâo lu mnuih ƀuôn sang Lăn Dap Kngư mđing uêñ, anôk mâo klei găl kơ lŏ hma leh anăn klei čiăng dŭ mdiăng mnơ̆ng dhơ̆ng lu. Ayŏng Nguyễn Phúc Lâm, Pô mgăt êdeh mdiăng mnơ̆ng ktuê êlan Gia Lai – ƀuôn prŏng Hồ Chí Minh, brei thâo:

“Mrâo êgao mâo klei kčĕ êlan dơ̆ng êran pral Pleiku – Dak Lak – Gia Nghĩa dưi ngă kâo bun yuôm bhăn snăl. Kyua mnơ̆ng dhơ̆ng găl êlan pral ăt jăk hĭn kơ êlan dơ̆ng ala čar, êran êlan pral êđăp ênang, mjing bruă duh mkra.”

Vũ Duy Hùng, mnuih ƀuôn sang să Gào čar Gia Lai, hơ̆k mơak  čang hmăng êlan dơ̆ng êran pral hnưm dưi pŏk êlan:

 “Kâo mơak snăk. Tal sa jing găn êrô găl ênưih, wưng bhiâo hin, mnơ̆ng dhơ̆ng lŏ hma dŭ mdiăng pral hĭn. Mnuih ƀuôn sang čiăng snăk yơh, lăn čar đĭ kyar kơh mnuih ƀuôn sang đĭ kyar.”

Hlue si klei kčĕ ksiêm dlăng, êlan dơ̆ng êran pral Pleiku – Ƀuôn Ama Thuôt – Gia Nghĩa jing sa kdrêč hlăm êlan dơ̆ng êran pral Dưr- Dhŭng nah Yŭ. Ktuê êlan mâo boh taih hlăm brô 258 km, hnơ̆ng wưng tal êlâo 4 grông êlan, ênoh bi liê tal êlâo giăm 77 êbâo êklai prăk. Anôk mphŭn kčưm mĭn tĭng mkŏ êlan dơ̆ng ala čar mrô 19 ti krĭng wăl Bàu Cạn, găn alŭ wăl čar Gia Lai, Dak Lak êlâo kơ mkŏ hŏng krĭng wăl Gia Nghĩa leh anăn êlan dơ̆ng êran pral Gia Nghĩa – Chơn Thành, čar Lâm Đồng.

Thái Đại Ngọc,  Khua hlăm bruă Đảng gưl dlông, Khua dlăng bruă Đảng čar Gia Lai brei thâo, êlan dơ̆ng êran pral amâo djŏ knŏng mjing boh kdrŭt mđĭ kyar kơ bruă duh mkra ôh ƀiădah lŏ mđĭ bi hgŭm krĭng, rơ̆ng êđăp ênang lĭng kahan - klei êđăp ênang krĭng Lăn Dap Kngư.

 “Dưi bi mklă êlan dơ̆ng êran pral mkŏ krĭng leh anăn mjing boh kdrŭt kơ tlâo čar, mđĭ lar mnơ̆ng dhơ̆ng lŏ hma hlue si hdră mrâo. Srăng bi mguôp kjăp bruă lĭng kahan, klei êđăp ênang hŏng dŭm ala čar mâo êlan knông lăn mbĭt hlue si hdră mđĭ kyar kluôm. Hŏng Gia Lai jing 56,7 km, srăng bi kan prăk knŭk kna grăp thŭn hmei srăng rơ̆ng.”

Ară anei êlan dơ̆ng êran pral Pleiku – Ƀuôn Ama Thuôt – Gia Nghĩa dôk ksiêm dlăng, kčĕ bi liê. Wăt tơdah čiăng mâo thiăm hruê mmông pŏk ngă, ƀiădah mnuih ƀuôn sang leh anăn bruă sang čư̆ êa alŭ wăl lăn Dap Kngư dôk čang hmăng ktuê êlan srăng hnưm dưi mkŏ mjing, mjing klei găl kơ klei găn êrô, dŭ mdiăng mnơ̆ng dhơ̆ng  leh anăn pŏk thiăm klei găl mđĭ kyar bruă duh mkra kơ krĭng wăl.