Khua bruă kƀĭn ala bi myuôm dŭm klei đru mguôp mơ̆ng Pô bi ala Olivier Brochet hlăm bruă mtrŭt mđĭ klei bi mjĕ Ƀĭng hgŭm phŭn Việt Nam - Prăng, hlăm anăn mâo klei bi mjĕ plah wah Bruă kƀĭn ala Việt Nam lehanăn Nghị viện Prăng. Khua bruă kƀĭn ala lač, klei bi mjĕ Việt Nam - Prăng dôk mâo lu klei găl čiăng lŏ dơ̆ng đĭ kyar ktang, boh nik leh dua ala čar mđĭ klei bi mjĕ jing Ƀĭng hgŭm phŭn kluôm dhuôm.

Anôk bruă kƀĭn ala Việt Nam čang hmăng hŏng Anôk bruă kƀĭn ala Prăng mđĭ hĭn klei bi trông êpul dŭm gưl, kah mbha klei thâo mkŏ mjing hdră bhiăn, ksiêm dlăng leh anăn mtrŭt mđĭ klei bi hgŭm plah wah dua ala čar hlăm dŭm mta bruă. Khua Anôk bruă kƀĭn ala Trần Thanh Mẫn mtă kơ Pô bi ala Olivier Brochet lŏ dơ̆ng jing kdrông mkŏ, đru mtrŭt mđĭ klei bi mjĕ Việt Nam - Prăng ƀrư̆ hruê ƀrư̆ êlam, klă sĭt leh anăn tŭ dưn. Pô bi ala Olivier Brochet bi mklă srăng lŏ dơ̆ng đru mguôp hlăm bruă mđĭ klei bi mjĕ leh anăn bi hgŭm plah wah dua ala čar, boh nik hlăm bruă kƀĭn ala.