Nai mtô mnuih K'Ho Ka Duys mâo leh 6 thŭn siă suôr hŏng Sang hră gưl dua Tân Thượng, să krĭng taih kbưi Đinh Trang Thượng. Mtô Ngữ văn ti sang hră mâo êbeh 95% hđeh jing mnuih K'Ho, ñu ƀuh sa klei amâo jăk: lu hđeh thâo dlăng, thâo čih klei yuăn ƀiădah amâo thâo dlăng, čih klei blŭ amĭ kkiêng. Mơ̆ng klei mĭn anăn, thŭn 2022, mâo Anôk bruă sang hră mđup brei, ñu Ka Duys mkŏ mjing adŭ hriăm klei K'Ho tal êlâo ti sang hră hŏng 40 čô hđeh adŭ 7. Phŭn tal êlâo jing mtô boh hră, leh kơ anăn ñu tui duah phung thâo mbruă hlăm krĭng hriăm tông čing, kdŏ čhuang leh anăn ba dŭm klei thâo anăn hlăm dŭm bruă ngă kơ phung hđeh. Nai mtô Ka Duys yăl dliê, dŭm mmông hriăm amâo djŏ knŏng đru thâo dlăng, čih klei K'Ho ƀiădah lŏ thâo săng hĭn kơ ênoh yuôm dhar kreh djuê ana pô.

"Jing mnuih K'Ho kâo ƀuh jing ară anei tơdah amâo mâo djă pioh ôh knhuah dhar kreh djuê ana snăn êdei anăp srăng ƀrư̆ luč ram. Mơ̆ng dŭm bruă ngă điêt mơ̆ng phung hđeh hriăm hră anei ăt jing klei mđĭ ai čiăng kơ phung hđeh dưi thâo dŭm boh tŭ yuôm dhar kreh, phung hđeh dưi mă dŭm klei thâo anăn phung hđeh djă pioh, kriê pioh knhuah dhar kreh đưm mơ̆ng mnuih K'Ho".

Ti dŭm sang hră krĭng mnuih djuê ƀiă mơ̆ng Lâm Đồng, lu phung nai ăt dôk tui duah hdră hrăm mbĭt hŏng phung hđeh mơ̆ng dŭm bruă klă klơ̆ng. Nai mtô Nguyễn Thị Hương Giang, Khua kiă kriê klei hriăm, Sang hră gưl tlâo Phan Đình Phùng, să Dam Rông, lač klei khăp kơ phung hđeh dưi bi êdah mơ̆ng bruă mprăp djăp ênŭm grăp klei hriăm, jih ai tiê hlăm grăp bruă mtô bi hriăm. Thŭn hriăm êgao phung hđeh sang hră mơ̆ng sang hră kyua nai Giang klam bruă mâo mă 9 klei pah mni hđeh hriăm thâo gưl čar mbĭt hŏng 4 klei čih mâo mă klei pah mni STEM gưl sang hră.

“Kâo mâo klei khăp hŏng phung hđeh snăn kơh kâo pŏk êlan kơ diñu. Hŏng phung hđeh dleh dlan snăn amâo djŏ knŏng mtô hlăm hdruôm hră ôh ƀiădah kâo atăt phung hđeh nao ti wăl anôk lăn mnga êa siam ktuê hang krông Krông Knô čiăng kơ phung hđeh dưi hriăm kơ dŭm klei kơ yan adiê, lăn ala, êa jua. Kâo mĭn dah mâo klei dleh dlan truh ƀiădah nai leh anăn phung hđeh brei bi ktưn mtô jăk leh anăn hriăm jăk sĭt”

Hŏng phung nai mtô ti krĭng dleh dlan, khăp kơ phung hđeh amâo djŏ knŏng mđing dlăng kơ grăp boh hră ôh. Anăn lŏ jing bruă duah hdră čiăng kơ phung hđeh amâo lui hriăm hră, đru kơ phung hđeh mâo klei hdĭp dleh dlan lŏ nao sang hră, mkŏ mjing wăl anôk čiăng kơ phung hđeh mnuih djuê ƀiă čŏng pô bi êdah pô.

Ai tiê anăn ăt mâo nai mtô Nguyễn Quốc Huy, Khua bruă Đảng, Khua sang hră gưl tlâo Nguyễn Trường Tộ, să Tân Hải, hlăm 22 thŭn ngă bruă. Ñu tuôm mâo 5 blư̆ mâo mă anăn knăl Pô mâo klei bi lông ktưn gưl nah gŭ. Hŏng nai Huy, klei yuôm bhăn hĭn jing mkŏ mjing sa boh sang hră phung hđeh čiăng nao grăp hruê. Mơ̆ng hdră kriê dlăng, ngă bruă mơ̆ng phung knuă druh, nai mtô truh kơ bruă mđing hmư̆ klei mĭn phung hđeh hriăm hră brei mđing truh kơ sa wăl anôk hriăm hră jăk siam.

“Awa Hô mtô nanao kơ drei kơ klei khăp kơ anak mnuih. Sang hră jăk mơak jing anôk klei mĭn jăk siam dưi bi sĭt. Phung knuă druh kriê dlăng snăn mđing hmư̆ nanao klei blŭ phung nai mtô. Phung nai thâo săng klei mĭn phung hđeh hriăm hră. Hriăm Awa jing hluê ngă sa wăl anôk êngiê hlăm anăn grăp klei blŭ dưi mpŭ, anăn jing phŭn agha mơ̆ng dhar kreh sang hră hơĭt kjăp.”

Mơ̆ng bruă mtô boh hră, mtô klei thâo truh kơ kriê pioh klei blŭ, dhar kreh djuê ana leh anăn mkŏ mjing wăl anôk hriăm hră jăk siam, phung nai, nai mtô ti krĭng taih kbưi Lâm Đồng dôk ngă bruă hŏng klei mbruă pla dŭm "asăr mjeh" klei thâo leh anăn klei đăo knang kơ phung hđeh. Grăp mmông hriăm, grăp bruă ngă amâodah klei uêñ mĭn kơ grăp klei hdĭp phung hđeh đru kơ diñu lŏ khăp kơ sang hră, khăp kơ dhar kreh djuê ana leh anăn hơĭt ai tiê čhuang mŭt hlăm êdei anăp.