Dŭm hruê anei, dŭm gưl adiê hjan nanao truh ti dŭm anôk rŭ mdơ̆ng Sang hră knŭk kna čiêm rông mlir gưl krĭng knông lăn čar Gia Lai. Ti ƀuôn hgŭm Ia Chia, bruă rŭ mdơ̆ng ti êngao adiê lu blư̆ mdei êjai. Grăp blư̆ adiê hjan jih, dŭm êtuh čô mnuih mă bruă lŏ bi kčah grăp mmông čiăng rŭ mdơ̆ng bi leh hnơ̆ng kčah. Vũ Phúc Tuân - Khua gĭt gai hdră bruă ti ƀuôn hgŭm Ia Chia, čar Gia Lai brei thâo:

“Hŏng hnơ̆ng bruă adôk jing prŏng êdi, knơ̆ng bruă hmei dôk tiŏ nao mnuih mơ̆ng krĭng Dưr hriê. Čiăng bi kƀĭn pral, hmei mdưm hră đĭ êdeh phiơr čiăng ba mnuih mă bruă hlăm anôk mă bruă. Ară anei, bruă bi leh, hmei tiŏ nao 40/50 čô mnuih mă bruă mơ̆ng krĭng Dưr hriê. Êngao anăn, hmei yua kdrăp krih, bi mguôp hŏng mnuih mă bruă čiăng mđĭ pral hnơ̆ng ngă bruă, ngă êngao mmông, mâo hdră êlan kơ mnuih mă bruă".

Sang hră knŭk kna rông ba mlir gưl să knông lăn Ia O ăt hưn brei răng kơ klei êmưt hluê ngă. Nguyễn Dũng Anh, Kiăng khua kiă kriê hdră bruă brei thâo, dŭm mta bruă dôk kƀah mnuih mă bruă mâo klei thâo, dleh snăk dưi hrui mă mơ̆ng phung mă bruă hlăm wưng bhiâo. Pô rŭ mdơ̆ng knŏng dưi bi mbŏ hnơ̆ng ngă bruă hŏng dŭm gưl mlam:

“Ară anei, dŭm bruă adôk čiăng kơ mnuih mă bruă thâo mbruă, msĕ si mkŏ mkra, bi leh. Hmei dôk mđing lehanăn lŏ iêo jak thiăm mnuih mă bruă čiăng mă bruă mlam, mă thiăm mmông čiăng hmao hnơ̆ng kčah. Ară anei, jih jang knuă druh, kỹ sư ăt msĕ mơh mnuih mă bruă ăt gĭr bi leh, ba jao anôk bruă sang hră êlâo kơ pŏk thŭn hriăm mrâo”.

Truh krah mlan 8, hnơ̆ng rŭ mdơ̆ng jih jang 7 boh sang hră knŭk kna rông ba mlir gưl hriăm gưl sa lehanăn gưl dua ti dŭm boh să knông lăn čar Gia Lai mâo hlăm brô 85%. Dŭm boh adŭ hriăm, sang jưh lehanăn sang bi kƀĭn phŭn rŭ mdơ̆ng leh, ƀiădah dŭm mta bruă msĕ si sang huă ƀơ̆ng, sang kriê pioh, sang mă bruă kơ phung nai ăt êmưt mơ̆ng 5 hruê truh mkrah mlan.

 Čiăng đru kơ phung ngă bruă bi mbŏ wưng mă bruă, giăm 780 čô knuă druh, lĭng kahan lŏ dơ̆ng păn kjăp anôk mă bruă khă gơ̆ bi leh hnơ̆ng bruă klam dưi jao. Đại tá Nguyễn Công Ngân - Kiăng khua bruă kđi čar hlăm Sư đoàn 320, Quân đoàn 34, gĭt gai êpul đru kơ anôk mă bruă ti să Ia O brei thâo:

 "Knơ̆ng gĭt gai lĭng kahan 34, hmei đru ti să Ia O, ngă leh bruă đru rŭ mdơ̆ng jih jang êbeh 3000m2 mtih jŭm dar sang hră. Êgao hdră kčah mơ̆ng 18/7. Ară anei, êpul hmei lŏ dơ̆ng đru kơ knơ̆ng bruă rŭ mdơ̆ng dŭm krĭng nah lam sang hră".

Lu hruê kăm êgao, khua gĭt gai bruă sang čư̆ êa čar Gia Lai nao ksiêm dlăng nanao dŭm anôk rŭ mkra, mă bruă hŏng phung duh bi liê lehanăn phung ngă bruă čiăng ruh mgaih dŭm klei gun kpăk mâo. Lâm Hải Giang, k'iăng khua bruă sang čư̆ êa čar Gia Lai, mñă klă čar amâo lŏ mkra mlih wưng bi leh hdră bruă; mtă kơ dŭm anôk bruă iêu mtrŭt jih hnơ̆ng mnuih mă bruă, kdrăp mnơ̆ng, mkŏ mjing klei ngă bruă kreh knhâo lehanăn mđing bi leh dŭm mta bruă yuôm bhăn mkăp kơ thŭn hriăm mrâo.

Dŭm knơ̆ng bruă, phung ngă bruă brei bi mklă hmao pŏk thŭn hriăm mrâo ti 7 sang hră knŭk kna čiêm rông jing hdră bhiăn, jing klei mtă mơ̆ng ai tiê phung khua kiă kriê. Hŏng djăp hdră, brei drei dưi găn klei dleh dlan, gĭr ktưn leh anăn gĭr ktưn hluê ngă bi leh dŭm mta phŭn mkăp kơ klei hriăm hră mơ̆ng phung hđeh, čiăng kơ thŭn hriăm mrâo, phung hđeh mâo sang hră mrâo".

Knŏng adôk êbeh sa hruê kăm êlâo kơ hruê pŏk thŭn hriăm mrâo, ti dŭm anôk rŭ mdơ̆ng Sang hră gưl sa leh anăn gưl dua ti dŭm să knông lăn čar Gia Lai, dŭm anôk bruă dôk bi ktưn hŏng hruê mmông čiăng bi leh djăp ênŭm drông dŭm êbâo čô hđeh mŭt hlăm thŭn hriăm mrâo hlăm dŭm boh sang hră prŏng siam, mđrăm mbĭt.