Êpul ksiêm dlăng mă leh bruă ti ƀuôn Kli A (ƀuôn hgŭm Ƀuôn Hồ), ƀuôn Tuôr (să Hòa Phú), ƀuôn Tơng Jŭ (să Ea Kao) leh anăn ƀuôn Akŏ Dhông (ƀuôn hgŭm Ƀuôn Ma Thuột). Mơ̆ng klei ksiêm dlăng brei ƀuh, leh mâo Knŭk kna đru, lu gŏ sang čŏng pô bi liê, pŏk mlar bruă duh bi liê, mkŏ mjing dŭm mta mnơ̆ng dhơ̆ng tui ksiêm nao mbĭt hŏng dhar kreh djuê ana, bruă pơ̆k mñam leh anăn bruă lŏ hma, ƀrư̆ ƀrư̆ mjing hdră duh ƀơ̆ng kơ mnuih ƀuôn sang alŭ wăl.

Dŭm alŭ wăl ăt akâo lŏ dơ̆ng bi leh hdră êlan hluê si hdră mđĭ hĭn klei mtô bi hriăm, đru hưn mdah, mkŏ mjing mnơ̆ng dhơ̆ng mdê hjăn, mđĭ klei thâo ngă bruă hiu čhưn ênguê, klei blŭ ala tač êngao leh anăn mtrŭt mđĭ klei bi hgŭm plah wah dŭm gŏ sang nao hgŭm hlăm bruă hiu čhưn ênguê êpul êya. Y Kle Knul, kiăng khua adŭ bruă dhar kreh să Hòa Phú lač:

“Čiăng lŏ dơ̆ng mđing dlăng đru kơ ai dưi kriê pioh sang krum dlông knhuah gru, bruă pơ̆k mñam, wăl anôk dhar kreh čing čhar, dŭm knăm mơak knhuah gru leh anăn mkŏ mjing mnơ̆ng dhơ̆ng hiu čhưn ênguê jiă knhuah dhar kreh alŭ wăl. Mđĭ ktang bruă mtrŭt mđĭ, hưn mthâo, mkŏ mjing tour bi hgŭm Ƀuôn Tuôr hŏng dŭm anôk hiu čhưn ênguê ti alŭ wăl čar čiăng pŏk mlar wăl anôk hiu čhưn ênguê leh anăn mđĭ boh tŭ dưn ba yua dŭm mnơ̆ng dhơ̆ng hiu čhưn ênguê êpul êya”.

Hluê si Đỗ Thị Như Tình, Khua bruă djuê ana hlăm Êpul gơ̆ng bruă ƀuôn sang čar Dak Lak, bruă hiu čhưn ênguê êpul êya knŏng dưi mđĭ kyar hơĭt kjăp tơdah mnuih ƀuôn sang klă sĭt jing pô phŭn nao hgŭm, hrăm mbĭt dưi dưn boh tŭ mơ̆ng hdră hiu čhưn ênguê. Bruă ba yua djŏ hdră dŭm boh tŭ yuôm knhuah dhar kreh amâo djŏ knŏng đru kriê pioh mnơ̆ng kriê pioh ƀiădah lŏ mjing klei iêo jak, mđĭ boh tŭ yuôm dŭm anôk hiu čhưn ênguê mơ̆ng Dak Lak.

Boh tŭ ksiêm dlăng srăng jing tur knơ̆ng yuôm bhăn čiăng kơ anôk bruă djŏ tuôm tĭng dlăng boh tŭ hdră mtrŭn ară anei leh anăn ba mdah hdră msir djŏ guôp hlăm wưng mrâo.

“Êpul ksiêm dlăng ăt čih yap dŭm klei hưn mdah boh sĭt hlăm hdră pŏk ngă hdră mtrŭn leh anăn dŭm hdră êlan ti alŭ wăl. Hluê anăn ăt srăng ksiêm dlăng ba mdah pŏk ngă sa hdră mtrŭn mrâo kơ hdră mđĭ kyar bruă hiu čhưn ênguê êpul êya mguôp hŏng bruă kriê pioh leh anăn mđĭ lar knhuah dhar kreh hlăm wưng mrâo snăn srăng ba wĭt boh tŭ dưn hĭn”./.