Ară anei, êlan klông krĭng kwar Krah - Lăn Dap Kngư ƀrư̆ ƀrư̆ dưi duh bi liê, boh nik dŭm ktuê êlan êran pral Dưr - Dhŭng leh anăn dŭm ktuê êlan mkŏ Ngŏ - Yŭ plah wah Lăn Dap Kngư hŏng ktuê hang ksĭ. Lu hdră bruă dôk pŏk ngă msĕ si Quy Nhơn - Pleiku, Khánh Hòa - Ƀuôn Ama Thuôt, Gia Nghĩa - Chơn Thành… dưi hmăng hmưi pŏk mlar wăl đĭ kyar, bi hrŏ mmông găn êrô leh anăn mjing klei găl kơ bruă hiu čhưn ênguê, logistics, mnia mblei.

Khă snăn, hluê si phung bi ala, bruă duh bi liê anôk bruă nah gŭ amâo dưi knŏng mdei ti bruă mkŏ dŭm ktuê êlan. Klei yuôm bhăn hĭn jing brei mkŏ mjing hdră mkŏ mbĭt plah wah dŭm ƀuôn prŏng, kdrŭn ksĭ, tač êdeh phiơr, ƀăng jang knông lăn, anôk bruă logistics leh anăn dŭm anôk hiu čhưn ênguê. Nguyễn Trùng Khánh, Khua anôk bruă hiu čhưn ênguê ala čar Việt Nam lač, êlan klông jing klei găl tal êlâo čiăng ba yua boh tŭ yuôm mnơ̆ng dhơ̆ng hiu čhưn ênguê:

“Kâo mĭn klei yuôm bhăn tal êlâo brei mghaih msir jing anôk bruă êlan klông, tơdah amâo mâo mkŏ êlan klông snăn dŭm anôk hiu čhưn ênguê khădah mâo mnơ̆ng dhơ̆ng lu jơr, jăk siam ƀiădah amâo dưi ba wĭt boh tŭ yuôm ôh, amâo dưi mđĭ kyar năng hŏng klei găl. Lač kơ anôk bruă êlan klông amâo mâo djŏ jing êlan klông lač kluôm ôh ƀiădah lŏ anôk bruă ti dŭm anôk hiu čhưn ênguê snăn kơh mjing boh tŭ yuôm čiăng kơ phung tuê nao dlăng, mđĭ hnơ̆ng jăk anôk truh, mđĭ klei bi ktưn mơ̆ng anôk truh”.

Ti anôk bi kƀĭn, dŭm anôk bruă kriê dlăng, alŭ wăl leh anăn anôk bruă duh mkra bi trông kơ hdră duh bi liê, iêo jak ai dưi yang ƀuôn, mđĭ kyar logistics, mkra mđĭ anôk bruă nah gŭ ti dŭm krĭng, anôk hiu čhưn ênguê leh anăn mđĭ klei bi hgŭm plah wah dŭm alŭ wăl. Klei msĕ mâo bi tŭ ư jing brei mlih mơ̆ng klei mĭn mđĭ kyar bruă hiu čhưn ênguê hluê krĭng knông lăn jing mđĭ kyar hluê wăl anôk leh anăn wăl hdĭp mda.

Hŏng Gia Lai, leh bi mŭt wăl êa ksĭ leh anăn krĭng čư̆ čhiăng, alŭ wăl mâo klei găl mkŏ mjing hdră mnơ̆ng dhơ̆ng hluê hdră "êa ksĭ-krĭng dap mnai-krĭng čư̆ čhiăng-čư̆ dliê prŏng". Kiăng khua knơ̆ng bruă sang čư̆ êa čar Gia Lai Nguyễn Thị Thanh Lịch lač, duh bi liê bruă mkŏ mkra êlan klông mlir krĭng jing boh kdrŭt kơ êdei anăp mơ̆ng kluôm krĭng kwar Krah-Lăn Dap Kngư, lŏ dơ̆ng bi mklă kơ klei đĭ kyar 2 ênoh mrô mơ̆ng grăp čar hlăm wưng kơ anăp:

Tơdah pŏk mlar wăl anôk mrâo hlăm anăn mâo anôk bruă hiu čhưn ênguê amâo djŏ knŏng Gia Lai đĭ kyar 2 ênoh mrô ôh ƀiădah dŭm čar ƀuôn prŏng hrăm mbĭt rơ̆ng kơ klei đĭ kyar mbĭt".