Ti krah yang hruê dơ̆ng ti ƀuôn Bu Bong, ƀuôn hgŭm Đức An, čar Lâm Đồng, asăp đĭng blŭ ba mbĭt hŏng ênai đĭng buôt ti anăp sang, aduôn Thị Hel dôk dlăng anak mtam pŏk đĭng blŭ hmư̆ hdră mđung asăp blŭ klei Mnông mơ̆ng Sang mđung asăp blŭ Việt Nam. Hŏng aduôn, dŭm klei blŭ hlăm đĭng blŭ ênưih êdi, ƀiădah klă sĭt hŏng gŏ sang:

"Kâo khăp hmư̆ ênhiang mmuñ. Mâo blư̆ hmư̆ hdră mđung klei mrâo kơ klei 5 čô hđeh djiê mngăt hlăm êa, leh anăn pô mblang mñă kơ mnuih ƀuôn sang yan bhang mđing dlăng, kriê dlăng anak čô, amâo brei phung hđeh čŏng nao mnei hlăm êa krông, êa hnoh. Kâo ƀuh dŭm klei mñă msĕ snăn klă sĭt. Anak mniê kâo ngă Facebook kơ kâo, mmông wăn kâo dlăng leh anăn ƀuh mâo asăp M'nông mơ̆ng Sang mđung asăp blŭ Việt Nam, mâo yăl dliê klei đưm, mmuñ ênhiang djuê ana, mâo video leh anăn asăp mmuñ mơ̆ng phung kâo thâo mơh. Kâo khăp dlăng êdi."

Hŏng amai Thị Nia (ti ƀon Tu Suay, să Đức An, čar Lâm Đồng), hdră klei M'nông msĕ si sa "hdruôm hră" klă sĭt. Amai mđing hmư̆ mơ̆ng kdrêč kriê dlăng klei suaih pral, hdră gang mkhư̆ klei ruă êngoh bi ktư̆, êngoh bi ƀlĕ êrah, truh kơ dŭm klei mtă mtăn "pla ya ana kyâo, rông ya mnơ̆ng" čiăng ba yua hlăm bruă duh mkra. Boh radio điêt jing "ƀĭng găp" siă suôr, ba dŭm ênhiang mmuñ jăk jĭn ti krah čư̆ dliê. Amai Thị Nia hơ̆k mơak yăl dliê:

“Kâo hmư̆ đĭng blŭ lu êdi. Nao kơ hma snăn đĭng blŭ lu blư̆ amâo mâo êlan pui kmlă dăng kông snăn kâo djă ba đĭng blŭ. Mâo anôk êlan pui kmlă awăt, kâo bi pŭ đĭng blŭ dlông hĭn, leh anăn kă ti dlông ana kyâo kơh hmư̆ klă. Hlăk kuai lăn, jik rơ̆k ăt hmư̆ đĭng blŭ ăt mơak mơh. Dôk ti sang kâo hmư̆ leh anăn dlăng hlăm Facebook. Kâo ƀuh Facebook M’nông jăk êdi. Dŭm video kơ klei mmuñ ênhiang M’nông hlăm Facebook anăn kâo like nanao. Kâo ăt khăp tui ksiêm adei H’Thi yăl dliê klei đưm M’nông anăn. Knŏng pŏk đĭng blŭ yơh dlăng mtam, ya mmông wăn ăt lŏ dlăng.

Mâo mnuih hmư̆ hdră mđung čiăng thâo hdră gang mkhư̆ klei ruă, mkra mjing; mâo mnuih dôk guôn sa ênhiang mmuñ djuê ana, sa klei yăl dliê đưm; Mâo mnuih dlăng čiăng mjuăt bi hriăm klei blŭ djuê ana pô. Mđung asăp klei Mnông VOV Lăn Dap Kngư êdu êun mŭt hlăm klei hdĭp. Amai H'Juel Sinur (Pô čih mkra mrâo klei Mnông, Hră klei mrâo mđung asăp - mđung rup čar Lâm Đồng) yăl dliê:

"Leh sa hruê mă bruă, kâo khăp êdi pŏk hdră klei M'nông mơ̆ng Sang mđung asăp blŭ Việt Nam čiăng hmư̆ klei mmuñ ênhiang, hmư̆ klei yăl dliê đưm. Lu blư̆ nao ti alŭ wăl, mnuih ƀuôn sang kreh êmuh kâo: 'Ti adŭ ih amâo mâo yăl dliê đưm, mmuñ ênhiang msĕ si VOV hĕ, tinăn diñu yăl dliê jăk êdi". Snăn hluê si kâo, anăn yơh jing klei tŭ jing êdi mơ̆ng êpul ngă hdră klei M'nông VOV Lăn Dap Kngư, kyua amâo djŏ knŏng mkăp klei hâo hưn ƀiădah lŏ đru kriê pioh dŭm ênhiang mmuñ, klei yăl dliê đưm leh anăn knhuah dhar kreh mơ̆ng djuê ana ti êlan mđung asăp mơh."

Tơdah êlâo adih mnuih ƀuôn sang bi tĭng djŏ mmông hmư̆ radio, snăn ară anei knŏng hŏng đĭng blŭ thâo mĭn, klei M'nông mâo leh hlăm djăp mmông, djăp anôk.

 Kdrêc̆ hla pŏk web VOV M'nông lehanăn Fanpage “Tiếng M’nông VOV Tây Nguyên” mưng leh hŏng mnuih ƀuôn sang. Kah knar grăp hruê kăm, hla pŏk web mâo êbeh 70.000 c̆ô mnuih nao dlăng; Fanpage mâo êbeh 6.000 c̆ô mnuih tui ksiêm. Lu klei c̆ih, video truh kơ dŭm pluh êbâo c̆ô mnuih dlăng. Dŭm ênoh mrô anăn brei ƀuh: klei mưng ƀrư̆ bi mlih, ƀiădah klei c̆iăng hmư̆ klei blŭ amĭ kkiêng ăt dôk mâo.

 Hŏng ayŏng Y Sưng Phêja, pô ngă bruă mđung asăp blŭ klei Mnông VOV Lăn Dap Kngư, klei bi mlih anăn jing sa hdră tui hriăm leh anăn mưng.

"Phŭn tal êlâo, hlăk mlih ngă bruă hră klei mrâo lu mta, klei hriăm thiăm kơ kdrăp mrâo hŏng hmei klă sĭt amâo djŏ ênưih ôh. Ƀiădah klei bi mlih anăn lŏ ba lu klei găl hĭn, đru kơ hdră mđung klei M'nông truh giăm hĭn hŏng ƀĭng hmư̆ Sang mđung asăp blŭ. Kâo khăp êdi kơ bruă hluê hdră mrâo mrang anei, kyua pô amâo djŏ knŏng ba klei hâo hưn hluê êlan mđung asăp ƀiădah lŏ dưi bi lar klei M'nông leh anăn dhar kreh M'nông hlăm wăl anôk mrô truh kơ lu mnuih hĭn, boh nik jing phung mda asei. Hŏng kâo, anei jing klei kpĭ, ăt msĕ mơh klei mđĭ ai čiăng kơ grăp hruê hriăm leh anăn mlih mrâo pô."

Lŏ wĭt lač kơ dŭm ai tiê anăn jing klei khăp sĭt suôr mơ̆ng ƀĭng găp hmư̆ Sang mđung asăp mơĭt hŏng grăp klei čih hlăm Fanpage klei Mnông.

Facebook Điểu Chí Jam mơĭt klei mtă:

“Dŭm klei mmuñ ênhiang jăk êdi, knăm mơak anei ti anôk jăk snăk phung ƀĭng găp... Phung ƀĭng găp ba lu klei mmuñ ênhiang, yăl dliê klei M'nông hlăm Facebook mơh, hmư̆ jăk êdi!”

Facebook Điểu Ntri snăn mơĭt klei mđĭ ai:

“Ayŏng adei gĭr hŏ, mă bruă bi jăk čiăng kơ arăng thâo mnuih Mnông drei mâo lu klei bhiăn jăk, dhar kreh siam. Drei gĭr ngă snăn kơh dưi djă pioh klei blŭ pô. Mta kñăm jing čiăng djă pioh klei blŭ, hưn mdah dhar kreh, kâo ƀuh jăk êdi!”

Dŭm klei mtă mtăn mđĭ ai anăn mơĭt klei čang hmăng hdră bruă klei M'nông mơ̆ng Sang mđung asăp blŭ Việt Nam mŭt hlăm sa knhuang mrâo kpưn đĭ hĭn mơ̆ng gru kruăk 20 thŭn mđung asăp. Y Thịnh Bon Yôk Ju, K'iăng khua knơ̆ng bruă sang čư̆ êa čar Dak Nông, pô mâo lu thŭn ksiêm hriăm dhar kreh djuê ana M'nông, bi êdah:

Amâo mâo djŏ knŏng phung êdam êra đuic̆ ôh, wăt hŏng lu mnuih hlăm gưl thŭn hmei, 6x, 7x, ăt thâo yua Facebook, Zalo, YouTube c̆iăng dlăng klei mrâo, hmư̆ klei mmuñ amâo dah lŏ dlăng dŭm hdră hŏng klei M'nông. Kyua anăn, êngao kơ hdră mđung mơ̆ng đưm, hdră mđung klei M'nông c̆iăng dưi ba ktang hĭn hlăm dŭm kdrăp mrô c̆iăng mnuih ƀuôn sang hlăm ala c̆ar ăt msĕ mơh ti ala tac̆ êngao ăt dưi ênưih thâo săng. Mbĭt hŏng anăn, êpul ngă bruă hdră mđung ăt c̆iăng jhŏng ba yua dŭm kdrăp mrâo, wăt klei thâo anak mnuih AI, pioh mkra mta phŭn jăk siam hĭn. Ƀiădah khădah mlih mrâo truh ti anôk ƀiădah klei yuôm bhăn hĭn ăt jing hâo hưn klei hâo hưn djŏ, klă, dưi djă pioh klei blŭ, knhuah dhar kreh leh anăn dŭm boh tŭ yuôm knhuah gru mơ̆ng djuê ana Mnông. Čang hmăng phung hđeh lŏ dơ̆ng djă pioh pui kđen khăp kơ bruă, nao lu hĭn, giăm mnuih ƀuôn sang hĭn, amâo mdei hriăm leh anăn mlih mrâo hdră ngă čiăng kơ klei Mnông ƀrư̆ hruê ƀrư̆ đĭ kyar, kbưi hĭn hlăm dŭm kdrăp hâo hưn mrâo mrang. Kâo đăo knang, tơdah klei Mnông ăt dôk kwang hlăm asăp mđung leh anăn dŭm kdrăp mrô snăn knhuah dhar kreh mơ̆ng djuê ana pô srăng dưi kriê pioh leh anăn lŏ čuê hŏng lu ênuk gưl."

Dua pluh thŭn - khădah hlăm êlan mđung asăp amâodah hŏng dŭm video đŭt hlăm hla pŏk Facebook, website…, iếng M’nông VOV Tây Nguyên dôk pŏk dŭm ktuê êlan mrâo čiăng truh hŏng ƀuôn sang. Hŏng ai tiê mơ̆ng phung čih mkra, phung mđung asăp leh anăn klei hrăm mbĭt mơ̆ng phung hmư̆, klei blŭ, boh hră leh anăn mngăt êwa dhar kreh M'nông srăng lŏ kwang nanao, lar bra nanao hlăm klei hdĭp hruê anei.