Hruê mbruê 20/8, Khua gĭt gai Đảng, Khua lăn čar Tô Lâm mă bruă hŏng Anôk bruă mkŏ mjing gưl dlông kơ Hdră bruă ksiêm wĭt 5 thŭn hluê ngă Hdră mtrŭn mrô 28 mơ̆ng Anôk kriê dlăng bruă Đảng gưl dlông tal XIII kơ bruă lŏ dơ̆ng mlih mrâo hdră kiă kriê, gĭt gai mơ̆ng Đảng hŏng anôk bruă kđi čar hlăm wưng mrâo. Leh hmư̆ klei hâo mdah leh anăn dŭm klei blŭ, Khua gĭt gai Đảng, Khua lăn čar Tô Lâm mtă kơ Anôk bruă mkŏ mjing gưl dlông bi sa hnơ̆ng klei thâo săng kơ anôk bruă, mta kñăm, klei čiăng mơ̆ng Hdră bruă.

Anei jing bruă klam kđi čar yuôm bhăn kơ bruă mkŏ mjing Đảng leh anăn bruă kđi čar; mta kñăm amâo djŏ knŏng bi leh klei hưn mdah amâodah lŏ mtrŭn hră mơar, ƀiădah brei thâo klă dŭm klei gun kpăk kơ klei ngă bruă, mơ̆ng anăn ba mdah hdră êlan, klei bhiăn mjing klei bi mlih hlăm wưng mrâo. Khua gĭt gai Đảng, Khua lăn čar mñă klă, mlih mrâo hdră kiă kriê, gĭt gai amâo ngă bi mlih mta phŭn, klei bhiăn leh anăn hdră kiă kriê phŭn mơ̆ng Đảng, ƀiădah kñăm ngă klei kiă kriê djŏ, kreh knhâo, êngiê, êlam leh anăn tŭ dưn hĭn. Mbĭt anăn, brei bi sa hnơ̆ng klei mĭn, klei thâo săng leh anăn bruă ngă kơ klei gĭt gai, kiă kriê; pŏk ngă klă sĭt hdră êlan "Đảng gĭt gai, Knŭk kna kiă kriê, Mnuih ƀuôn sang ngă phŭn".