Aguah ưm ti ƀuôn Tơ Drăh, să Bờ Ngoong, čar Gia Lai, kanan ksiêm să nao čuă gŏ sang Bái, 43 thŭn, mnuih Bahnar, êmuh kơ klei mă bruă knuă, klei suaih pral leh anăn klei hriăm hră mơ̆ng phung anak. Êbeh 1 thŭn êlâo, Bái tuôm tŭ hluê klei đăo “Ba Na Đêga Kon Kông” mơ̆ng arăng mkŏ mjing čiăng đoh ktŭng mnuih ƀuôn sang.

Bái yăl dliê, êjai mrâo mâo, diñu hâo hưn anei jing “klei đăo hjăn  mơ̆ng mnuih Bahnar”, mâo leh klei tŭ yap, kyuanăn lu mnuih hluê. Truh kơ Bruă sang čư̆ êa alŭ wăl leh anăn kahan ksiêm hlăk mblang, bi klă klei bi kdơ̆ng, mjhua hŏng klei đăo čiăng bi rai mơ̆ng phung bi kdơ̆ng djă kŏ, ñu ƀuh pô lĕ hlăm klei mjhua.

“Ba Na Kon Kông jing soh leh. Soh kyua bi kah djuê ana, Knŭk kna amâo mâo brei, Pô thâo soh pô lui yơh. Mnuih Bahnar leh anăn Jarai ti alŭ wăl pô mâo Knŭk kna uêñ mĭn lu sơnăk, êngoh duam mâo hră ênua mdrao mgŭn”.

Hluê si anôk bruă kahan ksiêm, mơ̆ng mlan 7 - 9/2025, êpul klei đăo “Ba Na Đêga Kon Kông” đoh ktŭng êbeh 350 čô ti 22 ƀuôn hlăm 7 să ti Gia Lai nao hgŭm. Hlăm klei bi klă, phung anăn mkŏ mjing hdră ngă bruă kjăp, ti gŭ klei đăo čiăng hâo hưn klei mĭn ktlah hjăn, bi kah djuê ana, bi kdơ̆ng hŏng Knŭk kna leh anăn mtrŭt mjhar klei mkrum mguôp prăk  soh hdră bhiăn čiăng đru kơ klei ngă bruă bi kdơ̆ng.

Thượng tá Phan Thanh Hải, K’iăng khua adŭ bruă klei êđăp ênang, kahan ksiêm čar Gia Lai brei thâo, “Ba Na Đêga Kon Kông” jing lŏ mlih mơ̆ng “Tin lành Đêga” mơ̆ng phung Fulro ti ala tač êngao kčŭt mčhur, gĭt gai čiăng bi luč klei êđăp ênang ti alŭ wăl. Krah mlan 5/2026, kahan ksiêm čar Gia Lai kčŭt hưn klei ngă soh “Bi rai hdră êlan bi mguôp” mă đa đa phung kmeh gơ̆ng mơ̆ng êpul anei”.

“Diñu bi đoh ktŭng ti krĭng mnuih djuê ƀiă čiăng mkŏ mjing sa kdêč mâo klei mĭn bi kdơ̆ng, bi rai Knŭk kna, čiăng mjhua, kčŭt mčhur, hưn kơ phung dôk ti ala tač êngao, mčeh loar kơ boh sĭt klei êđăp ênang kđi čar, leh anăn klei hdĭp mnuih ƀuôn sang, mă anăn jing mnơ̆ng čiăng kčŭt hưn Việt Nam ngă soh hŏng klei êngiê, klei dưi anak mnuih, čiăng bi toh hroh bruă klam leh anăn kơhưm lăn čar drei”.

 Hlăm klei kdơ̆ng mblah, čar Gia Lai ktang phĭt ƀuah mkra phung ba anăp. Nao mbĭt hŏng anăn, hŏng bruă čung ba, hâo hưn, ktung phung tuôm nao soh êlan lŏ wĭt kƀĭn sang kƀĭn kluôm, djŏ hdră bhiăn lăn čar. Ti dŭm ƀuôn êlan, khua mduôn, phung mâo kơhưm, khua dlăng bruă Đảng khua alŭ jing êpul kmeh gơ̆ng hlăm klei hâo hưn, mtrŭt mjhar mnuih ƀuôn sang thâo klă hdră mnêč mơ̆ng phung bi kdơ̆ng mjhua hŏng klei đăo. Đinh Chroh, khua ƀuôn Tơ Drăh, să Bờ Ngoong brei thâo:

“Pô lač hŏng mnuih ƀuôn sang Việt Nam mâo 54 djuê ana ayŏng adei. Amâo dưi bi ktlah mnuih Bahnar, mnuih Jarai amâodah Yuăn jing dŭm klei đăo hjăn, nao mklăk hŏng klei bi mguôp djuê ana”.

Đại tá Phạm Hữu Trường, k’iăng khua kahan ksiêm čar Gia Lai brei thâo, bi kdơ̆ng hŏng dŭm mta bruă mjhua hŏng klei đăo čiăng bi rai mâo nanao bruă Đảng, Khua kahan ksiêm čar bi klă jing bruă klam phŭn hlăm bruă răng mgang klei êđăp ênang, hơĭt kjăp ti alŭ wăl. Êngao kơ dŭm hdră thơ̆ng kơ bruă čiăng hm mơ̆ng hnưm, mơ̆ng kbưi bruă mkŏ mjing êpul, mđĭ kyar êpul kmeh gơ̆ng čiăng đoh ktŭng mnuih ƀuôn sang, êpul kahan ksiêm lŏ mtrŭt mđĭ hâo hưn hlăm klei mĭn, bi lar bruă klam mơ̆ng khua mduôn, phung mâo kơhưm leh anăn jih jang phung tuôm lĕ lŏ wĭt djŏ êlan.

"Bi kdơ̆ng, msir jih jang hŏng bruă krŭ wĭt Fulro, Ba Na Đêga Kon Kông đru rơ̆ng kjăp klei êđăp ênang ti alŭ wăl. Boh nik hŏng klei kdơ̆ng mblah, bi râo đa da phung kmeh gơ̆ng lŏ wĭt jing êpul hur har hlăm hdră bruă jih jang mnuih ƀuôn sang răng mgang klei êđăp ênang lăn čar, mtrŭt mjhar lu phung tuôm soh êlan wĭt hŏng klei đăo phŭn”.

Klei bi kdơ̆ng hŏng dŭm êpul mjhua bruă djuê ana, klei đăo čiăng bi kdơ̆ng ti Lăn Dap Kngư leh anăn čar Gia Lai ăt adôk sui, dleh ksiêm dlăng. Kyua phung bi kdơ̆ng mlih nanao hdră ngă bruă, mjhua klei kƀah thâo săng mơ̆ng mnuih ƀuôn sang čiăng rah klei mĭn bi ktlah, bi rai klei bi mguôp djuê ana.

Ƀiădah hŏng klei nao hgŭm ktang phĭt mơ̆ng êpul ngă bruă, mbĭt hŏng klei ai ai mơ̆ng gưl bruă Đảng nah gŭ, Bruă sang čư̆ êa leh anăn mnuih ƀuôn sang, dŭm klei amâo mâo djŏ, bi kdơ̆ng mjhua hŏng klei đăo amâo lŏ mâo ôh, klei êđăp ênang srăng dưi lŏ krơ̆ng kjăp ti čư̆ čhiăng Lăn Dap Kngư./.