Leh mkŏ dăp anôk bruă Knŭk kna gưl čar, Khánh Hoà pŏk mlar wăl anôk đĭ kyar hŏng êbeh 8.700 km2 lăn hang, 65 anôk bruă Knŭk kna gưl să mbĭt hŏng krĭng êa ksĭ prŏng. Klei čuăl mkă dưi mkŏ mjing kjăp, nao hlăm hŏng hdră bhiăn čuăl mkă thŭn 2025 leh anăn lŏ dơ̆ng mđing hmư̆ klei blŭ mguôp mơ̆ng dŭm phŭn, dhar bruă, gưl dlông mbĭt hŏng mnuih ƀuôn sang.

 Hluê si klei čuăl mkă, Khánh Hòa tă hdră jing anôk mkŏ krĭng Dhŭng kwar krah leh anăn Lăn Dap Kngư, mă êlan Nha Trang - Đà Lạt jing mta phŭn čiăng mkŏ mjing wăl anôk bi mguôp “Êa ksĭ - Čư̆ čhiăng”. Gru hmô mđĭ kyar mơ̆ng Khánh Hoà dưi bi klă hŏng hdră: Sa hdră trah dlăng mbĭt - 2 êlan mkŏ - 3 kiêng đĭ kyar - 4 kmeh gơ̆ng boh kdrŭt. Hlăm anăn, 4 kmeh gơ̆ng boh kdrŭt đĭ kyar mơ̆ng Khánh Hoà mâo: bruă hiu čhưn ênguê hnơ̆ng jăk, mlih mrâo mbruă leh anăn bi mlih mrô, bruă mkra mjing dŭ mdiăng êlan êa ksĭ, tuh tia mkra mjing…hlăk mblang êlam hin kơ hdră tă anei, Châu Ngô Anh Nhân, khua knơ̆ng bruă ngăn prăk čar Khánh Hoà brei thâo:

Bi kơ bruă pui kmlă, kñăm mđĭ kyar dŭm mta pui kmlă mrâo, pui kmlă doh, hlăm anăn, mâo pui kmlă hạt nhân ti Dhŭng čar Khánh Hoà. Bi kơ hdră tă mđĭ kyar wăl krah, krĭng ƀuôn sang, êlâo thŭn 2030, čar Khánh Hoà jing ƀuôn prŏng gưl dlông, mkŏ mjing 21 wăl krah, hlăm anăn mâo 5 wăl krah mta 2 leh anăn gĭr mâo djăp ênoh čuăn wăl krah mta 2 leh anăn 16 wăl krah mta 3”.

Bi kơ hdră tă truh thŭn 2050, Khánh Hoà gĭr jing anôk bruă duh mkra êa ksĭ prŏng mơ̆ng lăn čar, mđĭ kyar mtah leh anăn knar hŏng alŭ wăl Asi. Blŭ hrăm hlăm klei kƀĭn trông, khua Bruă sang čư̆ êa čar Khánh Hoà Nguyễn Việt Hùng mñă ktang, bruă hưn mdah klei čuăl mkă amâo djŏ jing klei mjhưh ruĕ ƀiăng jing kčưm kơ wưng đĭ kyar mrâo. Klei tŭ dưn srăng dưi mkă hŏng dŭm hdră tŭ dưn leh anăn klei mlih jăk hlăm klei hdĭp mnuih ƀuôn sang. Čar Khánh Hoà ƀuăn mđĭ kyar pral leh anăn hơĭt kjăp, ktang phĭt amâo mâo bi mlih wăl hdĭp mda, ngăn dŏ leh anăn mnơ̆ng kriê pioh čiăng mă klei đĭ kyar ti anăp. Čiăng mkŏ mjing klei đăo knang kơ ênoh prăk duh bi liê, Khua Bruă sang čư̆ êa čar Khánh Hòa Nguyễn Việt Hùng mñă klă:

 “Lŏ dơ̆ng kñăm ruh mgaih dŭm klei kpăk kơ klei đĭ kyar, boh nik jing dŭm boh klei kơ čuăl mkă, lăn ala, duh bi liê, ruh mgaih anôk ala leh anăn hră mơar Knŭk kna. Klei čuăl mkă pŏk wăl anôk đĭ kyar. bruă klam drei jing săng hluê ngă klei anăn, mbĭt anăn jing hŏng êpul êya knơ̆ng bruă, phung duh bi liê kâo hmăng hmưi diih ksiêm dlăng klei čuăl mkra anei jing tur knơ̆ng čiăng duh bi liê wưng sui ti Khánh Hoà”.