Ti să Tây Khánh Sơn, alŭ wăl čư̆ čhiăng mâo lu mnuih ƀuôn sang jing mnuih djuê ƀiă, ară anei knŏng mâo mă 135 čô nai, adôk kƀah 30 čô. Đa đa mta hriăm msĕ si klei blŭ tuê, Âm nhạc, Tin học… amâo mâo nai mtô, mgô̆ brei nao duah nai mơ̆ng alŭ wăl mkăn nao đru. Phạm Ngọc Hải,  khua bruă Đảng să Tây Khánh Sơn  brei thâo, alŭ wăl mkŏ mjing leh bruă ruah phung nao mtô ƀiădah amâo mâo pô ngă hră mơar.

"Alŭ wăl să Tây Khánh Sơn mâo 5 sang hră adôk kƀah 30 čô nai mtô. Hmei hâo hưn, mtrŭt mjhar duah phung nai hŏng bruă ngă hră kuôl kă. Pătdah ai iêo jak phung nai wĭt ti krĭng čư̆ čhiăng ka ktang ôh kyuanăn mđung lu sơnăk ƀiădah amâo mâo sa čô nai wĭt ôh. Să hmei hmăng hmưi čar đru brei hŏng hdră tiŏ nao phung nai mơ̆ng krĭng dăp hriê mă bruă ti čư̆ čhiăng”.

Boh klei anei amâo djŏ knŏng mâo ti Tây Khánh Sơn ƀiădah lŏ mâo ti lu alŭ wăl čư̆ čhiăng mkăn mơ̆ng čar Khánh Hoà msĕ si Khánh Vĩnh, Bác Ái…Êlâo dih, klei kƀah phung nai mtô krĭng čư̆ čhiăng mâo dŭm kdriêk hlăm čar msir hŏng klei bi mlih tuôr. Ƀiădah, mơ̆ng ngă gru hmô bruă Knŭk kna alŭ wăl 2 gưl, hdră tiŏ nao, mlih tuôr phung nai ka dưi lŏ mkŏ wĭt ôh. Hluê si Lê Đình Thuần, k’iăng khua knơ̆ng bruă sang hră mơar čar Khánh Hoà, anei jing klei dleh ka dưi msir mtam ôh:

"Hmei srăng lŏ dơ̆ng ksiêm duah čiăng mâo dŭm hdră êlan, iêo jak phung nai wĭt mă bruă ti krĭng dleh dlan. Tơdah hưn mdah sa hdră mtrŭn srăng akâo kơ hdră êlan, tŭ ư hŏng hdră êlan, mkŏ mjing hdră mtrŭn, mă ênoh bi liê, bi klă ênoh bi liê, lu mta bruă dleh sơnăk”.

Ti anăp boh sĭt dŭm sang hră krĭng čư̆ čhiăng kƀah nai mtô, knơ̆ng bruă sang hră mơar čar Khánh Hoà lŏ čiăng mâo mmông ksiêm duah, khua bruă Đảng čar Khánh Hoà Trần Phong mñă kơ knơ̆ng bruă brei mjêč ksiêm dlăng hdră ngă bruă mơ̆ng dŭm alŭ wăl hlăm kluôm ala, êlâo kơ ksiêm duah - ba mdah hdră êlan.

"Tơdah kluôm ala amâo lŏ mâo ôh snăn hlăk anăn kơh pô ksiêm hriăm kơ hdră êlan. Ară anei, dŭm alŭ wăl găp mâo leh snăn pô dlăng, tui hriăm. Kyua hdră êlan anei jưh knang kơ ngăn prăk alŭ wăl, klei dưi kyua Êpul gơ̆ng bruă ƀuôn sang čar bi mklă. Čar mâo klei găl snăn đru ƀiădah bruă jing knuih mơ̆ng čar hŏng phung nai tơdah nao mă bruă ti krĭng čư̆ čhiăng si ngă?”

 Msir mgaih klei kƀah nai mtô krĭng čư̆ čhiăng ti Khánh Hòa amâo djŏ knŏng jing klei yăl dliê hrŏng ruah ôh, ƀiădah jing hnơ̆ng mkă kơ klei mđing uêñ, bruă klam jih bruă kđi čar hŏng bruă mtô bi hriăm krĭng čư̆ čhiăng. Klei dŭm sang hră krĭng čư̆ čhiăng čiăng ară anei jing klei pral, mbruă mơ̆ng dŭm anôk bruă đru kčĕ hlăm klei iêô jak phung nai mtô. Čiăng kơ tơdah thŭn hriăm mrâo kčưm, dŭm sang hră krĭng čư̆ čhiăng amâo lŏ dôk hlăm klei dleh dlan hiu duah nai mtô.